Падзеі, факты, анонсы

10 лютага, Мінск /Кар. БЕЛТА/. Беларус Антон Кушнір трэці раз у сезоне перамог на этапе Кубка свету па фрыстайле ў лыжнай акрабатыцы. У карэйскім Боквангу алімпійскі чэмпіён 2014 года паказаў лепшы рэзультат сярод 12 фіналістаў, паведамляе карэспандэнт БЕЛТА.

У фінале Антон Кушнір выконваў не самы складаны скачок, але, на думку спецыялістаў, зрабіў яго ўпэўнена і без памылак. У выніку рэзультат пераможцы - 119,47 бала. Крыху ніжэй суддзі ацанілі выступленне прынцыповага саперніка беларуса Ці Гуанпу з Кітая - 118,55. Трэцяе месца заняў амерыканец Мак Боханан - 116,74.

У ходзе сезона Кубка свету беларускі спартсмен, які вярнуўся да актыўных выступленняў на трампліне, перамог у кітайскім гарадку Бейда Лейк і амерыканскім Лейк-Плэсідзе. Два іншыя беларусы ў Боквангу не змаглі прайсці кваліфікацыю і завяршылі барацьбу раней. Станіслаў Гладчанка заняў 19-е месца. Максім Гусцік размясціўся на 25-м месцы падагульняючага пратакола.

У жаночых спаборніцтвах беларуска Аляксандра Раманоўская прабілася ў фінал, дзе заняла чацвёртае месца - 53,36 бала. Пераможцам стала Сю Ментаа з Кітая - 96,93 бала.

Наступны этап Кубка свету па фрыстайле ў лыжнай акрабатыцы пройдзе 25 лютага ў рэспубліканскім цэнтры алімпійскай падрыхтоўкі "Раўбічы".