Падзеі, факты, анонсы

Старт тыдням дала выстаўка плакатаў на тэму "Шлях да адзінства Германіі", якая адкрылася 25 верасня. Прайшло таксама некалькі канцэртаў, у ліку якіх канцэрт у Белдзяржфілармоніі да 330-годдзя з дня нараджэння Баха.

Вечары нямецкага кіно, якія пачынаюцца ў Мінску 28 верасня, прадоўжаць гэты культурны форум. Гледачам будуць прадстаўлены пяць вядомых мастацкіх фільмаў, знятых у апошнія гады ў Германіі. Фільмы дэманструюцца на нямецкай мове з рускімі субтытрамі. Вечары, арганізаваныя пасольствам Германіі і інстытутам імя Гётэ, дэманструюцца ў кінатэатры "Перамога".

Праграмай тыдняў прадугледжана нямала іншых сустрэч. Гледачоў чакаюць разнапланавыя мерапрыемствы - ад літаратурных чытанняў да тэатральных пастановак, ад спецыяльных мерапрыемстваў для педагогаў і вучоных да кінапрэзентацый, ад выставак да канцэртаў. У іх ліку - публічнае чытанне на рускай і нямецкай мовах, фестываль кароткаметражных германскіх кінафільмаў, фотавыстаўка Іветы Вайводэ і Даніэля Зайферта. Цікавым абяцае быць і літаратурнае кафэ з абмеркаваннем рамана Вольфганга Херндорфа. Адна з сустрэч у Гістарычнай майстэрні імя Левіна будзе называцца "Актоберфэст і іншыя святы ў сучаснай Германіі". У праграме таксама канцэрты арганнай музыкі нямецкіх музыкантаў, спектакль "Вораг народа" паводле п'есы Генрыка Ібсэна.

Акрамя таго, запланаваны Дзень навуковых даследаванняў, прэзентацыя даследчага праекта Германскага навукова-даследчага таварыства аб Белавежскай пушчы. Пройдзе фотавыстаўка аб дэпартацыі яўрэяў з горада Бона ў Трасцянец.

У гэтым годзе тыдні Германіі будуць асабліва маштабнымі і прадоўжацца амаль месяц, да 24 кастрычніка, з нагоды юбілейнай даты - 25-годдзя аб'яднання Германіі. Як лічыць Надзвычайны і Паўнамоцны Пасол ФРГ у Беларусі Петэр Дэтмар, 2015 года напоўнены шматлікімі важнымі памятнымі датамі. "Трэба накіраваць погляд у будучае і развіваць галіны, у якіх мы звязаны дружбай і партнёрствам", - сказаў дыпламат.

Разнастайную праграму тыдняў падрыхтавалі працуючыя ў Беларусі прадстаўнікі нямецкіх культурных і адукацыйных арганізацый - інстытут імя Гётэ, Германская служба акадэмічных абменаў, Цэнтральнае ўпраўленне па справах нямецкай адукацыі за мяжой, прадстаўніцтва Нямецкай асацыяцыі народных універсітэтаў, Інстытут нямецкіх даследаванняў і Мінскі міжнародны адукацыйны цэнтр імя Ёханэса Раў, а таксама беларускія партнёры, універсітэты і асабліва ўдзельнікі праекта "Школы: партнёры будучага".

Правядзенне тыдняў Германіі ў Беларусі стала добрай традыцыяй. Гэта мерапрыемства арганізуецца на працягу больш як дзесяці гадоў. Іх праграма адрасавана ўсім, хто цікавіцца нямецкімі культурай, мовай і грамадствам.