Падзеі, факты, анонсы

У Вене на турніры Vienna Indoor Gala Аліна Талай перамагла на дыстанцыі 60 м з бар'ерамі з часам 7,88 сек. Раней асабісты рэкорд беларускі складаў 7,94 сек. Гэта дасягненне дало магчымасць ёй зноў узначаліць сусветны топ-ліст рэзультатаў у кароткім бар'ерным бегу, спаборніцтвы ў якім праводзіліся па ходзе зімовага сезона.

Гэта пятая за кароткі час перамога Талай на "зімовых" міжнародных турнірах, прычым трэцяя ў Аўстрыі. Раней яна ўжо першынствавала на іншым турніры ў Вене на дыстанцыі 60 м з бар'ерамі (рэзультат - 8,00 сек.), пасля ёй не было роўных у нямецкім Дзюсельдорфе (7,96 сек.), а потым і ў Маскве на прадстаўнічым турніры "Руская зіма" (8,02 сек.). На мінулым тыдні Аліна Талай перамагла ў аўстрыйскім горадзе Лінц (7,94 сек.).

Шэраг высокіх рэзультатаў змаглі паказаць беларускія лёгкаатлеты на Кубку Беларусі па доўгіх кіданнях, якія прайшлі ў АСК "Стайкі" (Мінскі раён) У кіданні молата ў жанчын гродзенская спартсменка Алена Крэчык у апошняй спробе адправіла снарад на 69 м 43 см, стаўшы ўладальніцай узнагароды вышэйшай вартасці, а таксама другога рэзультату сезона ў свеце. Апярэджвае беларуску на гэты момант толькі спартсменка з Малдовы Марына Маргіева-Нікішчанка (70 м 41 см).

Алена Собалева (Навагродская), якая прадстаўляе Гродзенскую вобласць, спаборнічала ў кіданні молата ў маладзёжнай узроставай катэгорыі і перамагла з рэзультатам 69 м 25 см, які цяпер дае ёй магчымасць уваходзіць у тройку мацнейшых малатабоек свету ў гэтым сезоне. Таццяна Халадовіч з Брэсцкай вобласці выйграла спаборніцтвы ў сектары для кідання кап'я з рэзультатам 61 м 70 см і перамясцілася з 5-га на 4-е месца ў сусветным топ-лісце.