Падзеі, факты, анонсы

1 сакавіка, Мінск /Кар. БЕЛТА/. Абменныя гастролі паміж Беларускім дзяржаўным акадэмічным музычным тэатрам і Тульскім дзяржаўным акадэмічным тэатрам драмы імя М.Горкага адкрываюцца сёння. Аб гэтым паведаміў на прэс-канферэнцыі ў Мінску дырэктар Беларускага дзяржаўнага акадэмічнага музычнага тэатра Аляксандр Пятровіч, перадае карэспандэнт БЕЛТА.

Беларускі тэатр, які ўжо пяты раз сустрэнецца з тульскай публікай, пакажа спектакль "Вяселле ў Малінаўцы". Гэта ж музычная камедыя будзе паказана і 3 сакавіка. Беларусы ўключылі ў рэпертуар мюзіклы, у прыватнасці "Соф'я Гальшанская", "Мая цудоўная лэдзі", мюзікл для дзяцей і дарослых "Прыгоды Кая і Герды". У гастрольнай афішы таксама аперэта "Лятучая мыш", балет "Тысяча і адна ноч". Завершыць гастролі 8 сакавіка канцэрт з удзелам салістаў і сімфанічнага аркестра "Мюзікл-гала".

Аляксандр Пятровіч дадаў, што ўжо склалася традыцыя, калі Беларускі дзяржаўны акадэмічны музычны тэатр прадстаўляе праграму "Стары Новы год" у Тульскім акадэмічным тэатры драмы. Паводле яго слоў, у Туле з вялікай цікавасцю сустракаюць мінскіх артыстаў.

Гэту тэму прадоўжыў намеснік дырэктара Тульскага дзяржаўнага акадэмічнага тэатра драмы імя М.Горкага Аляксей Емяльянаў. Ён адзначыў, што тульскія гледачы заўсёды чакаюць трупу беларускага тэатра і нязменна прымаюць яе горача. Тульскія гледачы з задавальненнем ходзяць і на аперэту, і на балет, і на іншыя пастаноўкі мінскіх артыстаў. Прычым цікавасць выклікаюць як новыя, прэм'ерныя спектаклі, так і тыя, што ўжо былі паказаны на тульскай сцэне.

Паводле слоў Аляксея Емяльянава, тульскі тэатр спадзяецца, што беларускі глядач таксама ацэніць спектаклі, прывезеныя ў Мінск. Гастролі адкрыюцца прэм'ернай музычнай камедыяй "За двума зайцамі". Незабыўнае відовішча абяцаюць паказаць госці ў крымінальнай камедыі "Пікавы валет" паводле аднайменнай аповесці Барыса Акуніна. А п'еса вядомага расійскага пісьменніка і драматурга Юрыя Палякова "Як багі" злучае камедыю, трагедыю з фарсам.

Эксклюзіўным спектаклем госці называюць мюзікл "Тульскія цуды" паводле матываў казкі Ляскова "Ляўша". Гэта спектакль для сямейнага прагляду, які расказвае пра гісторыю Тулы і пра знакамітага ўмельца.

Завершыць гастролі камедыя "Боінг-Боінг". Гэта п'еса, якая ўвайшла ў Кнігу рэкордаў Гінеса як французская п'еса, што найбольш часта выконваецца за мяжой, - спроба пахуліганіць. Спектакль стане яркай фінальнай кропкай 8 сакавіка.

Тульскі акадэмічны тэатр драмы імя М.Горкага другі раз прыехаў у Мінск. Папярэднія гастролі адбыліся ў 2013 годзе, і калектыў вельмі рады вярнуцца на гасцінную сцэну Беларускага музычнага тэатра, дадаў Аляксей Емяльянаў.