Незвычайныя мясціны Беларусі: Аўгустоўскі канал

Унікальнае гідратэхнічнае збудаванне XIX стагоддзя, знакамітая штучная артэрыя на воднай карце Еўропы і сапраўды адна з найпрыгажэйшых выдатных мясцін Беларусі і Польшчы – Аўгустоўскі канал – зноў адкрывае турыстычны сезон.

Першай яркай падзеяй у летнім календары-2016 стала ўжо традыцыйнае свята народнай творчасці "Аўгустоўскі канал збірае сяброў": сотні турыстаў 21 мая прыехалі на фэст каля шлюза "Дамброўка". У праграме – выступленні лепшых творчых калектываў Гродзенскай вобласці, прыгожае тэатралізаванае шэсце ў беларускіх касцюмах, горад майстроў і кірмаш handmade, "беларускія падворкі" з дэгустацыямі самых смачных страў нацыянальнай кухні... Ужо з гэтага дня аматары актыўнага адпачынку могуць падарожнічаць на цеплаходзе "Нёман", катацца на катамаранах або сплаўляцца на байдарках, арганізоўваць прагулкі па веламаршрутах парку "Аўгустоўскі канал".

Яшчэ адзін грандыёзны падарунак да лета-2016 - адкрыццё новага музея гісторыі Аўгустоўскага канала, месцам для якога стаў старадаўні домік наглядчыка шлюза "Дамброўка".

Да старту сезона далучыліся і ўдзельнікі II Беларуска-польскага турыстычнага форуму, якія ў гэтыя дні абмяркоўвалі развіццё сумеснага брэнда "Аўгустоўскі канал". І не выпадкова: турыстычная жамчужына на стыку граніц трох краін – Беларусі, Польшчы і Літвы – ужо даўно стала месцам цікавых культурных і спартыўных падзей. Па традыцыі ў ліпені ўздоўж берагоў канала пройдзе міжнародны веламарафон "Суседзі", а ў жніўні Дамброўка прыме знакаміты фестываль "Аўгустоўскі канал у культуры трох народаў" з азартнымі спаборніцтвамі па балотным футболе і незвычайнымі заплывамі "На чым папала".