Настаяцель каталіцкай абшчыны Часлаў Курэчка – лаўрэат прэміі "За духоўнае адраджэнне"

Амаль 9 гадоў таму ксёндз Часлаў Курэчка прыехаў у прыгранічную вёску Росіца Верхнядзвінскага раёна на поўначы Беларусі. Мудрым служэннем яму ўдалося не толькі змяніць стогадовы Троіцкі касцёл, але і аб'яднаць жыхароў наваколля – людзей розных канфесій і ўзростаў. Захоплены садоўнік і дэкаратар, ксёндз Часлаў ператварыў тэрыторыю храма ў цудоўны куток. Некалькі разоў у год у Росіцу прыязджаюць паломнікі з Беларусі і іншых краін, каб ушанаваць памяць свяшчэннікаў Антонія Ляшчэвіча і Юрыя Кашыры, якія разам з мірнымі жыхарамі былі спалены фашыстамі ў лютым 1943 года. Пад кіраўніцтвам настаяцеля тут акультурылі мемарыял: да брацкай магілы ад храма ксёндз Часлаў высадзіў Алею благаслаўлёных з туй і барбарыса як сімвал цярністага шляху росіцкіх мучанікаў...