Парламенцкія выбары ў Беларусі

12 ліпеня, Мінск /Святлана Саўко - БЕЛТА/. Парламенцкая кампанія ў Беларусі праходзіць арганізавана і ў адпаведнасці з нацыянальным заканадаўствам. Аб гэтым сёння журналістам заявіў старшыня выканаўчага камітэта - выканаўчы сакратар СНД, кіраўнік місіі наглядальнікаў ад Садружнасці Сяргей Лебедзеў, перадае карэспандэнт БЕЛТА.

Сяргей Лебедзеў адзначыў, што выбарчая кампанія ў Беларусі набірае абароты. "Кампанія праходзіць арганізавана, у адпаведнасці з беларускім заканадаўствам, - сказаў Сяргей Лебедзеў, - на гэты момант мы ацэньваем кампанію як спакойную".

Старшыня выканкама СНД расказаў, што місія Садружнасці па назіранні за парламенцкімі выбарамі ў Беларусі пачала сваю дзейнасць, акрэдытаваны ўжо 25 доўгатэрміновых наглядальнікаў, гэта дыпламаты, супрацоўнікі выканкама СНД. "Яны ўжо працуюць у цесным кантакце з Цэнтральнай выбарчай камісіяй, і з праваахоўнымі структурамі, назіраюць за фарміраваннем выбарчых камісій усіх узроўняў, падтрымліваюць кантакт са СМІ", - праінфармаваў Сяргей Лебедзеў.

"Па меры набліжэння даты выбараў місія актывізуе сваю дзейнасць", - дадаў старшыня выканкама СНД. Колькасць наглядальнікаў ад СНД павялічыцца. Паводле слоў Сяргея Лебедзева, колькасць доўгатэрміновых наглядальнікаў плануецца павялічыць да 44, а кароткатэрміновых будзе амаль трыста.