Парламенцкія выбары ў Беларусі

Вылучэнне кандыдатаў у дэпутаты праходзіць з 3 ліпеня па 1 жніўня. Па стане на 28 ліпеня выбарчыя камісіі атрымалі дакументы аб вылучэнні 263 чалавек. "Гэта значыць, ужо конкурс у сярэднім па рэспубліцы складае больш за два чалавекі на месца", - сказала Лідзія Ярмошына.

Пры гэтым кіраўнік ЦВК выказала меркаванне, што ў бліжэйшыя дні будзе паступаць вялікая колькасць дакументаў аб вылучэнні, паколькі набліжаецца апошні тэрмін іх падачы.

Паводле слоў Лідзіі Ярмошынай, на гэты час 194 чалавекі вылучаны адным спосабам, 69 - некалькімі. У тым ліку шляхам збору подпісаў грамадзян вылучана 26 патэнцыяльных кандыдатаў, дакументы на якіх паступілі ўжо ў выбаркамы, працоўнымі калектывамі - 19, палітычнымі партыямі - 149.

Кіраўнік Цэнтрвыбаркама таксама расказала, што 26,6 працэнта з ліку вылучаных кандыдатур складаюць жанчыны, грамадзяне ва ўзросце да 30 гадоў - 10,6 працэнта, 6,1 працэнта - дэпутаты Палаты прадстаўнікоў цяперашняга склікання, 11,8 працэнта з'яўляюцца дэпутатамі мясцовых саветаў.

У адпаведнасці з данымі прыёмнай па зваротах грамадзян, у перыяд з моманту аб'яўлення выбараў і па 28 ліпеня паступіла 75 зваротаў, 20 з іх (каля 27 працэнтаў) не звязана з выбарамі. З 55 зваротаў, якія датычацца арганізацыі і правядзення электаральнай падзеі, розныя скаргі змяшчаліся толькі ў 22 зваротах, большая частка змяшчае просьбы растлумачыць заканадаўства і пракансультаваць.