Парламенцкія выбары ў Беларусі

20 ліпеня, Мінск /Кар. БЕЛТА/. Колькасць зарэгістраваных акруговымі выбаркамамі ініцыятыўных груп грамадзян па зборы подпісаў выбаршчыкаў у падтрымку асоб, якіх прапануюць для вылучэння кандыдатамі ў дэпутаты Палаты прадстаўнікоў Нацыянальнага сходу шостага склікання, зменшылася да 443. Такая інфармацыя размешчана на афіцыйным сайце Цэнтральнай камісіі Беларусі па выбарах і правядзенні рэспубліканскіх рэферэндумаў, паведамляе БЕЛТА.

Усяго акруговыя выбаркамы зарэгістравалі 446 ініцыятыўных груп, з іх тры праінфармавалі ўжо, што спынілі сваю дзейнасць па зборы подпісаў. Размова ідзе аб ініцыятыўных групах, зарэгістраваных па Брэсцкай-Заходняй выбарчай акрузе нумар 1, Баранавіцкай-Усходняй выбарчай акрузе нумар 6, Вілейскай выбарчай акрузе нумар 74. Як растлумачыў карэспандэнту БЕЛТА сакратар ЦВК Мікалай Лазавік, канчатковая колькасць ініцыятыўных груп, якія выканалі сваю місію, будзе вядома, калі яны здадуць падпісныя лісты ў акруговыя камісіі.

Таксама з'явіліся звесткі яшчэ аб двух патэнцыяльных кандыдатах, якія прайшлі перыяд вылучэння. Размова ідзе аб прадстаўніках ад Магілёўскай вобласці. Адзін з іх вылучаны Рэспубліканскай партыяй працы і справядлівасці, другі - працоўным калектывам.

Выбары дэпутатаў у Палату прадстаўнікоў Нацыянальнага сходу Беларусі шостага склікання назначаны на 11 верасня.