Парламенцкія выбары ў Беларусі

8 верасня, Мінск /Кар. БЕЛТА/. Выбары ў беларускі парламент каштуюць амаль $10 млн. Аб гэтым 8 верасня расказала старшыня Цэнтрвыбаркама Лідзія Ярмошына ў сваім чарговым відэазвароце, размешчаным на сайце vybory2016.by, паведамляе БЕЛТА.

Лідзія Ярмошына адзначыла, што для таго, каб выбары ў Палату прадстаўнікоў адбыліся, у іх павінна прыняць удзел больш за 50 працэнтаў выбаршчыкаў, унесеных у спісы для галасавання. "Таму так важна яўка выбаршчыкаў", - растлумачыла яна. Старшыня ЦВК заклікала ўспрымаць гэта з разуменнем, паколькі выбары - важнае дзяржаўнае мерапрыемства. "І нават справа не ў тым, што яны каштуюць даволі дорага - амаль $10 млн, але ў тым, што выбранне парламента, паспяховае завяршэнне важнейшай палітычнай выбарчай кампаніі - гэта, перш за ўсё, аснова палітычнай стабільнасці нашай дзяржавы. Гэта паўнацэнны палітычны легітымны орган, які будзе супрацоўнічаць з парламентамі іншых дзяржаў, дастойна прадстаўляць нас і абараняць нашы інтарэсы", - падкрэсліла яна.

"Калі вас не задавальняюць кандыдаты, якія балаціруюцца па гэтай выбарчай акрузе, існуе графа "Супраць усіх". Хоць я думаю, што ў нас дастойны падбор кандыдатаў, якія прадстаўляюць усе пункты гледжання", - заўважыла Лідзія Ярмошына.

Паводле яе слоў, беларускія выбаршчыкі атрымаюць СМС з заклікам прагаласаваць на выбарах. Так, праз аператараў мабільнай сеткі будуць накіраваны наконт гэтага адпаведныя запрашэнні. "Гэта не з'яўляецца парушэннем заканадаўства, гэта - інфармаванне выбаршчыкаў. Мы не ведаем нумароў вашых тэлефонаў, і ніякага выдавання асабістых звестак грамадзян не адбываецца. Паведамленні вам разашле аўтамат", - заўважыла яна.

Пры гэтым Лідзія Ярмошына выказала меркаванне, што іх атрымаюць не толькі выбаршчыкі, але і замежныя грамадзяне, можа, нават замежныя наглядальнікі, а таксама непаўналетнія, аднак датычыцца гэта толькі выбаршчыкаў - паўналетніх грамадзян Беларусі. "Таму прашу вас паставіцца да гэтага з разуменнем, і калі вы падтрымліваеце гэту дзяржаўную кампанію, прыйсці на выбарчыя ўчасткі і прагаласаваць за таго кандыдата, чыя праграма для вас найбольш блізкая", - сказала яна.

Старшыня ЦВК таксама звярнула ўвагу, што ў краіне няма "дня цішыні", таму агітацыйная кампанія можа ажыццяўляцца да нядзелі. "Нават у суботу, 10 верасня, можна агітаваць за выбранне таго ці іншага кандыдата. У нас ёсць забарона толькі для агітацыі за байкот, зрыў выбараў. Вось гэта з'яўляецца парушэннем закона, і асобы, якія будуць праводзіць такую агітацыю, могуць быць пакараны ў адміністрацыйным парадку, гэта значыць штрафам", - падкрэсліла яна.

Выбары ў Палату прадстаўнікоў Нацыянальнага сходу Беларусі адбудуцца 11 верасня.