Парламенцкія выбары ў Беларусі

11 верасня, Мінск /Кар. БЕЛТА/. Усе звароты наглядальнікаў эфектыўна вырашаюцца. Аб гэтым заявіла сёння журналістам старшыня Цэнтрвыбаркама Лідзія Ярмошына, перадае карэспандэнт БЕЛТА.

"Што датычыцца скаргаў, то ў пачатку дня яны калі і паступалі, то наконт акрэдытацыі асобных наглядальнікаў на выбарчых участках. Усе гэтыя звароты эфектыўна вырашаюцца, і там, дзе правы наглядальнікаў парушаны, ЦВК іх аднаўляе", - сказала Лідзія Ярмошына.

Паводле яе слоў, за мінулую ноч ніякіх інцыдэнтаў, звязаных з выбарамі, не было. "Паводле паведамлення аператыўнага штаба МУС, усё прайшло спакойна, усе выбарчыя ўчасткі знаходзяцца ў цэласці і захаванасці і сёння адкрыліся для правядзення галасавання", - праінфармавала Лідзія Ярмошына.

Яна звярнула ўвагу, што абстаноўка на выбарчых участках добразычлівая. Працуюць буфеты, іграе музыка, пачынаюцца канцэрты. "Зроблена ўсё, каб абстаноўка свята суправаджала выбаршчыкаў у ходзе дня галасавання", - дадала яна.

Пастаяннае аператыўнае інфармаванне аб ходзе выбарчай кампаніі ідзе праз інфармацыйны цэнтр ЦВК. "Міжнародныя наглядальнікі тут таксама могуць самавыявіцца", - рэзюмавала Лідзія Ярмошына.