Галоўныя навіны

Перагаворы Лукашэнкі і Пуціна завяршыліся, лідары размаўлялі больш за пяць гадзін

26 верасня, Мінск /Кар. БЕЛТА/. Перагаворы ў Крамлі прэзідэнтаў Беларусі і Расіі Аляксандра Лукашэнкі і Уладзіміра Пуціна завяршыліся. Лідары краін у розных фарматах размаўлялі 5 гадзін і 22 мінуты, паведамляе БЕЛТА.

Сустрэча стартавала днём пасля 12.00. Роўна паўтара гадзіны прэзідэнты гаварылі тэт-а-тэт у Прадстаўніцкім кабінеце. Затым Аляксандр Лукашэнка і Уладзімір Пуцін правялі рабочае снеданне. Тэлеграм-канал "Пул Першага" апублікаваў меню: бялковы амлет са стронгай і спаржай, рол з пастрамой з ялавічыны, зялёная грэчка з авакада і яйкам, прасяная каша з гарбузом і буякамі. А яшчэ - кіноа на адтопленым малацэ з персікам і тварожная запяканка з разынкамі і  клубніцамі.

Пасля снедання размова прадоўжылася. На той момант лідары краін ужо размаўлялі ў агульнай колькасці 3 гадзіны і 40 мінут. Але, відавочна, парадак дня не быў вычарпаны, і яны пайшлі ў рабочы кабінет Прэзідэнта Расіі.

Агульны хранаметраж сустрэчы - 5 гадзін 22 мінуты.

У пачатку сустрэчы ў прысутнасці СМІ Аляксандр Лукашэнка і Уладзімір Пуцін зрабілі невялікія заявы. Кіраўнік беларускай дзяржавы прапанаваў калегу абмеркаваць шэраг рэгіянальных праблем, а таксама некаторыя пытанні двухбаковага парадку дня.

Аляксандр Лукашэнка зноў заявіў аб намеры абмеркаваць магчымасць будаўніцтва ў Беларусі яшчэ адной АЭС, у тым ліку з разлікам на пастаўкі электраэнергіі ў новыя рэгіёны Расіі. Пытанні фінансавання таксама былі абазначаны, але дэталі Прэзідэнт публічна агучваць не стаў.

"Калі будзе рашэнне, мы адразу пачнём новы энергаблок або новую станцыю ставіць, калі будзе патрэбнасць на захадзе Расіі і ў вызваленых рэгіёнах", - сказаў беларускі лідар.

У сваю чаргу Уладзімір Пуцін падкрэсліў, што пытанне з фінансаваннем наогул не стаіць: "Калі ёсць спажывец, які будзе браць электраэнергію і плаціць патрэбны тарыф, гэта наогул не праблема".

Прэзідэнты пагадзіліся з тым, што атамная энергетыка ў цэлым садзейнічае якаснаму росту эканомікі і з'яўленню новых напрамкаў. Гэта, напрыклад, пашырэнне выкарыстання электратранспарту, перавод на электрычнае ацяпленне жылога сектара, магчымасці для развіцця штучнага інтэлекту, майнінгу, будаўніцтва дата-цэнтраў.

Уладзімір Пуцін у сваім уступным слове падкрэсліў, што Беларусь - сур'ёзны партнёр Расіі ў галіне атамнай энергетыкі. "Створана першая АЭС у Беларусі і, больш таго, узнікла галіна ў Беларусі, спецыялісты якой цяпер разам з "Расатамам" працуюць нават над узвядзеннем атамных аб'ектаў у трэціх краінах. І гэта, вядома, не можа не радаваць", - сказаў ён.

Прэзідэнт Расіі таксама заявіў, што сітуацыя па супрацоўніцтве дзвюх краін у эканамічнай сферы вельмі добрая - тавараабарот звыш $50 млрд і прадаўжае расці. Па ўсіх напрамках ідзе актыўная работа, у тым ліку ў пытаннях забеспячэння бяспекі Саюзнай дзяржавы.

версія для друку

зрабіць стартавай

дабавіць у выбранае