Галоўныя навіны

Аб'яўляючы пераможцу ў намінацыі "Лепшы спектакль для дзяцей", вядомы дзіцячы пісьменнік Уладзімір Ліпскі адзначыў, што святая справа - рабіць дабро для дзяцей. Ён з задавальненнем назваў уладальніка звання "Лепшы спектакль для дзяцей" - "Снежная каралева" Х.К. Андэрсена Драматычнага тэатра Беларускай Арміі. Актрыса Марына Дзянісава за ролю ў гэтым спектаклі атрымала ўзнагароду "Лепшая акцёрская работа ў спектаклі для дзяцей". Уладальнікам тытула "Лепшая рэжысёрская работа ў спектаклі для дзяцей" стаў Аляксандр Янушкевіч за спектаклі "Малыш і Карлсан, які жыве на даху" А. Ліндгрэн у Беларускім дзяржаўным тэатры лялек і "Шматочкі па закуточках" Р. Остэра ў Мінскім абласным тэатры лялек "Батлейка".

У намінацыі "Лепшы спектакль музычнага тэатра" альтэрнатывы на лаўры лепшага не было і ўзнагарода дасталася спектаклю "Соф'я Гальшанская" У. Кандрусевіча Беларускага дзяржаўнага акадэмічнага музычнага тэатра. Антон Заянчкоўскі за выкананне партыі Ягайлы ў гэтым спектаклі атрымаў званне "Лепшая акцёрская работа ў спектаклі музычнага тэатра". Узнагарода "Лепшая рэжысёрская работа ў спектаклі музычнага тэатра" ўручана Міхаілу Кавальчыку мастаку-пастаноўшчыку мюзікла "Соф'я Гальшанская".

"Лепшым спектаклем тэатра лялек" журы назвала спектакль "Ладдзя роспачы" У. Караткевіча Беларускага дзяржаўнага тэатра лялек. Акцёр тэатра Дзмітрый Рачкоўскі за выкананне ролі Гервасія ў гэтым спектаклі атрымаў тытул "Лепшая акцёрская работа ў спектаклі тэатра лялек". Аднак лепшым акцёрам тэатра лялек судзейская калегія прафесіяналаў назвала таксама і Уладзіміра Тэвасяна за ролю Барыса Гадунова ў спектаклі "Самазванец" Брэсцкага абласнога тэатра лялек. Галасы журы ў гэтай намінацыі падзяліліся пароўну.

Узнагарода "Лепшая рэжысёрская работа ў спектаклі тэатра лялек" дасталася Аляксею Ляляўскаму за дзве работы: спектакль "Ладдзя роспачы" У. Караткевіча Беларускага дзяржаўнага тэатра лялек і "Самазванец" паводле А. Пушкіна Брэсцкага абласнога тэатра лялек.

Безальтэрнатыўны намінант у намінацыі "Лепшы спектакль балета" - "Вітаўт" В. Кузняцова Нацыянальнага акадэмічнага Вялікага тэатра Рэспублікі Беларусь, ён жа атрымаў і тытул. Званне "Лепшая акцёрская работа ў спектаклі балета" дасталася Людміле Хітровай за ролю ў балеце "Вітаўт", а "Лепшая работа балетмайстра ў спектаклі балета" - Юрыю Траяну.

Балет "Вітаўт" В. Кузняцова Нацыянальнага акадэмічнага Вялікага тэатра Беларусі стаў яшчэ пераможцам і ў намінацыі "Лепшая сучасная беларуская пастаноўка", хоць прэтэндэнтаў на гэты тытул было некалькі.

Вялікі тэатр святкаваў перамогу і яшчэ раз. Спектакль "Лятучы галандзец" Р. Вагнера быў названы "Лепшым оперным спектаклем". Узнагароду "Лепшая акцёрская работа ў спектаклі оперы" атрымаў Станіслаў Трыфанаў, а "Лепшая рэжысёрская работа ў спектаклі оперы" - Ханс-Іаахім Фрай.

Лаўрэатам у намінацыі "Лепшы мастак-пастаноўшчык" аб'яўлены Валерый Рачкоўскі (пасмяротна) за два спектаклі: "Ладдзя роспачы" У. Караткевіча Беларускага дзяржаўнага тэатра лялек і "Самазванец" Брэсцкага абласнога тэатра лялек.

Уручаючы ўзнагароду "Мецэнат тэатра" старшыні ААТ "Белзнешэканамбанк" Паўлу Калауру, міністр культуры Беларусі Барыс Святлоў прапанаваў: ці не ўвесці такую адзінку вымярэння, як калаур - адзін калаур, два калауры, калі размова будзе ісці аб ацэнцы ўкладу мецэнатаў.

Найбольшая колькасць прэтэндэнтаў была ў намінацыі "Лепшы спектакль тэатра драмы". Але лепшым журы назвала "Аракул?.." А.Макаёнка Нацыянальнага акадэмічнага драматычнага тэатра імя М.Горкага. Аб'явіла пераможцу старшыня ЦВК Лідзія Ярмошына. Пад апладысменты залы яна пракаменціравала перамогу: "Хоць журы працавала ў адсутнасці міжнароднага назірання, думаю, выбар быў свабодным, дэмакратычным". Рэжысёр-пастаноўшчык спектакля народны артыст Беларусі Барыс Луцэнка падзякаваў за прызнанне.

Раман Салаўёў за работу ў спектаклі "Пахавайце мяне за плінтусам" П. Санаева Нацыянальнага акадэмічнага драматычнага тэатра імя Я. Коласа атрымаў прыз "Лепшая акцёрская работа ў спектаклі тэатра драмы". Пераможцам у намінацыі "Лепшая рэжысёрская работа ў спектаклі тэатра драмы" названы Саўлюс Варнас "Фрэкен Жулі" А. Стрындберга Магілёўскага абласнога драматычнага тэатра.

Эфектным завяршэннем вечара стала аб'яўленне ўладальніка ўзнагароды "За ўклад у развіццё тэатральнага мастацтва". На сцэну Купалаўскага выехаў аўтамабіль "Шэўрале дэ Люкс" 1937 года, які належаў Янку Купалу. З яго выйшла народная артыстка Беларусі Наталля Гайда, якой намеснік прэм'ер-міністра Беларусі Анатоль Тозік уручыў узнагароду.

Вызначала пераможцаў прафесійнае журы па спецыяльных секцыях: тэатра драмы, тэатра лялек і музычнага тэатра (опера, балет, музычная камедыя і іншыя музычныя жанры). У экспертную камісію ўвайшлі прадстаўнікі творчых саюзаў, Мінкультуры, тэатральныя крытыкі, мастацтвазнаўцы, творчыя работнікі, прадстаўнікі прафесійных калектываў мастацкай творчасці.

Фінальныя мерапрыемствы конкурсу прайшлі 24-30 лістапада. На ацэнку прафесійнага журы прэтэндаваў 21 спектакль, у тым ліку 11 пастановак тэатра драмы, 6 - тэатра лялек і 4 - музычнага тэатра.

Трэці конкурс "Нацыянальная тэатральная прэмія" набыў новую статуэтку. Аўтарам ідэі прыза конкурсу стаў дызайнер Уладзімір Цеслер. Скульптар - Іван Артымовіч. Прыз Нацыянальнай тэатральнай прэміі прыняў аблічча бусла на антычнай калоне, крылы якога падобныя да тэатральнай заслоны.

Упершыню Нацыянальную тэатральную прэмію ўручылі ў 2011 годзе. У мінулым годзе тэатральнае спаборніцтва не праводзілася - назапашваўся багаж спектакляў, удасканальваўся парадак правядзення конкурсу. Яго арганізатарамі выступаюць Міністэрства культуры Беларусі і Мінгарвыканкам.