Галоўныя навіны

Макраэканамічная стабільнасць і павышэнне якасці жыцця. Лукашэнка назваў базавыя мэты ЕАЭС

29 мая, Астана /Кар. БЕЛТА/. Прэзідэнт Беларусі Аляксандр Лукашэнка на пасяджэнні Вышэйшага Еўразійскага эканамічнага савета назваў базавыя мэты ЕАЭС, перадае карэспандэнт БЕЛТА.

"Рэагаваць на актуальны парадак дня трэба абавязкова, але базавымі мэтамі саюза былі і застаюцца макраэканамічная стабільнасць і павышэнне якасці жыцця грамадзян, - заявіў Аляксандр Лукашэнка. - Паказчыкі мінулай пяцігодкі сведчаць аб тым, што мы свядома і паслядоўна рухаемся ў гэтым напрамку".

Беларускі лідар адзначыў, што ВУП дзяржаў - членаў "пяцёркі" вырас на 16,6 працэнта, экспарт сферы паслуг паміж краінамі саюза - у 2,6 раза. Узаемны гандаль таварамі павялічыўся да рэкордных $95 млрд, або ў 1,7 раза. Пры гэтым яго доля ў знешнегандлёвым абароце ЕАЭС павысілася з 15 працэнтаў да 20 працэнтаў.

"На жаль, даводзіцца шмат адцягваць увагі на тое, каб збалансаваць знешнія фактары. Сітуацыя ў свеце развіваецца па канфліктным сцэнарыі, - падкрэсліў кіраўнік дзяржавы. - Падзеі на Блізкім Усходзе выклікалі ў шэрагу краін дэфіцыт паліва, важнейшых матэрыялаў, угнаенняў. Запушчана вялізная лавіна праблем, і мы пакуль не ведаем, дзе менавіта і якой сілы ўдар яна нанясе".

Разам з тым Прэзідэнт перакананы, што незалежна ад сітуацыі, якая складваецца на знешнім контуры, ні ў якім разе нельга збаўляць тэмпы работы па дасягненні мэт Дагавора аб ЕАЭС.