Галоўныя навіны

Лукашэнка прысутнічаў на парадзе Перамогі на Краснай плошчы ў Маскве

Фота РІА Навіны

9 мая, Масква /Кар. БЕЛТА/. Прэзідэнт Беларусі Аляксандр Лукашэнка прысутнічаў на парадзе ў гонар 80-й гадавіны Перамогі ў Вялікай Айчыннай вайне, які праходзіць на Краснай плошчы ў Маскве, перадае карэспандэнт БЕЛТА.

Парад прымаў міністр абароны Расіі Андрэй Белавусаў. На цэнтральнай трыбуне побач з ветэранамі размясціліся Прэзідэнт Расіі Уладзімір Пуцін і замежныя лідары. Кіраўнікі дзяржаў разам прыбылі на Красную плошчу. Да гэтага расійскі лідар асабіста прывітаў кожнага.

Гасцямі ўрачыстых мерапрыемстваў у расійскай сталіцы сталі больш за 20 кіраўнікоў дзяржаў. Сярод іх лідары краін СНД, а таксама Кітая, Бразіліі, Славакіі, Сербіі, В'етнама, Манголіі, Зімбабвэ, Кеніі, М'янмы, Экватарыяльнай Гвінеі і іншых краін.

Побач з Прэзідэнтам Беларусі на трыбуне быў яго малодшы сын Мікалай і прэм'ер-міністр Арменіі Нікол Пашынян.

Парадным разлікам па маскоўскай брусчатцы прайшлі прадстаўнікі ўзброеных фарміраванняў краін СНД і армій з іншых дружалюбных дзяржаў. Аляксандр Лукашэнка стоячы прывітаў беларускіх ваеннаслужачых.

Пасля завяршэння парада лідары краін усклалі вянкі да Магілы Невядомага Салдата ў Аляксандраўскім садзе ля сцен Крамля.

Аляксандр Лукашэнка прыбыў з рабочым візітам у Маскву 8 мая напярэдадні Дня Перамогі. Увечары ў Крамлі адбыўся канцэрт для кіраўнікоў дэлегацый, запрошаных на ўрачыстыя мерапрыемствы з нагоды 80-й гадавіны Перамогі ў Вялікай Айчыннай вайне. Мерапрыемства прайшло ў Андрэеўскай зале. Лідары краін таксама скарысталіся магчымасцю для нефармальных сустрэч.

версія для друку

зрабіць стартавай

дабавіць у выбранае