Галоўныя навіны

9 мая, Мінск /Кар. БЕЛТА/. Прэзідэнт Беларусі, Прэзідэнт Нацыянальнага алімпійскага камітэта Аляксандр Лукашэнка падпісаў заяўку на ўдзел беларускай каманды ў XXIII зімовых Алімпійскіх гульнях, паведамілі БЕЛТА ў прэс-цэнтры НАК Беларусі.

XXIII зімовыя Алімпійскія гульні пройдуць з 9 па 25 лютага 2018 года ў горадзе Пхёнчхан (Рэспубліка Карэя), дзе будзе прадстаўлена сем відаў спорту, якія ўключаюць у сябе 15 зімовых спартыўных дысцыплін: тры каньковыя (фігурнае катанне, канькабежны спорт і шорт-трэк), шэсць лыжных (гарналыжны спорт, лыжны спорт, фрыстайл, лыжнае дваябор'е, скачкі з трампліна і снаўборд), дзве бабслейныя: бабслей і скелетон; а таксама чатыры іншыя віды спорту: біятлон, кёрлінг, хакей і санны спорт.

На гэты час айчынныя спартсмены змагаюцца за права выступіць у такіх відах спорту, як біятлон, фрыстайл, лыжныя гонкі, канькабежны спорт, шорт-трэк, фігурнае катанне. Плануецца, што беларускія атлеты змогуць заваяваць 25-30 ліцэнзій.

НАК Беларусі, Міністэрства спорту і турызму, федэрацыі па відах спорту вядуць актыўную падрыхтоўку да ўдзелу беларускай дэлегацыі ў Алімпіядзе-2018. Заключаны кантракты па экіпіроўцы спартсменаў і трэнераў, білетнай праграме, прапрацаваны пытанні транспартнай лагістыкі, размяшчэння, тэхнічнага і медыцынскага аснашчэння ў адпаведнасці з паступаючымі заяўкамі ад нацыянальных федэрацый.

Беларускія спартсмены ўдзельнічаюць у зімовых Алімпійскіх гульнях з 1964 года. Першы медаль у скарбонку каманды прынесла ў 1968 годзе ў Грэноблі ў лыжных гонках Рыта Ачкіна. Самастойнай зборнай беларускія спартсмены пачалі выступаць на Гульнях у Лілехамеры ў 1994 годзе, дзе было заваявана два сярэбраныя медалі.

Усяго ў актыве беларускіх спартсменаў 19 медалёў, з іх сем залатых. У складзе суверэннай каманды з 1994 па 2014 год заваявана 15 медалёў: шэсць залатых, чатыры сярэбраныя і пяць бронзавых. Самай тытулаванай спартсменкай з'яўляецца трохразовая чэмпіёнка, Герой Беларусі Дар'я Домрачава, якая атрымала перамогу ў трох індывідуальных гонках на Алімпіядзе-2014 і заваявала бронзу на Гульнях-2010.