Галоўныя навіны

Лукашэнка бачыць магчымасці для дасягнення тавараабароту $1 млрд з Калужскай вобласцю

27 ліпеня, Мінск /Кар. БЕЛТА/. У Беларусі і Калужскай вобласці ёсць магчымасці для дасягнення тавараабароту $1 млрд. Аб гэтым Прэзідэнт Беларусі Аляксандр Лукашэнка заявіў на сустрэчы з губернатарам Калужскай вобласці Уладзіславам Шапшой, перадае карэспандэнт БЕЛТА.

"Адносіны паміж намі, на шчасце, развіваюцца нядрэнна. Але мы планавалі ў свой час мільярдны тавараабарот. Недацягваем, трэба шукаць напрамкі, - падкрэсліў беларускі лідар. - Магчымасці гіганцкія ў вобласці. Мільярд - гэта, думаю, нармальна паміж Беларуссю і Калужскай вобласцю. Будзем на гэта арыентавацца". 

Гаворачы аб магчымасцях беларускага боку, Прэзідэнт назваў напрамкі, якія дадуць магчымасць давесці тавараабарот паміж Беларуссю і Калужскай вобласцю да адзнакі $1 млрд. "Я думаю, гэта не толькі і не столькі звычайны гандаль, хаця ён для нас таксама вельмі важны. Мы ўжо навучыліся працаваць у вашай вобласці і гатовы да будаўніцтва сацыяльных аб'ектаў, а вы ўсё ж такі нямала іх ствараеце ў вобласці. Гатовы пад ключ пабудаваць і здаць (адпаведныя аб'екты. - Заўвага БЕЛТА), каб было відаць аблічча Беларусі", - запэўніў ён.

Ён звярнуў увагу на магчымасць стварэння і развіцця кааперацыйных сувязей паміж Беларуссю і Калужскай вобласцю: "Ведаю, што ёсць праекты, якія рэалізуюцца з МАЗам, БЕЛАЗам... Пакуль мы іх там рэалізуем, мы гатовы да супрацоўніцтва з вамі ў гэтым напрамку, гатовы пастаўляць вам любую тэхніку".

Аляксандр Лукашэнка ўказаў і на такі напрамак супрацоўніцтва, як сельская гаспадарка. Нягледзячы на ​​тое, што ў Калужскай вобласці нядрэнна развіты аграрны сектар, беларускі бок гатовы пры неабходнасці дзяліцца сваімі напрацоўкамі. "Вопыт малочнатаварных комплексаў, аграгарадкоў, наогул выбудоўванне структуры сельскагаспадарчай вытворчасці і жыцця людзей у вёсцы. Мы падобныя, клімат у нас прыкладна аднолькавы, - падкрэсліў Прэзідэнт. - Таму мы гатовы пад ключ стварыць пэўныя комплексы на вялікіх плошчах сельскагаспадарчых угоддзяў, гатовы паказаць той варыянт, які мы ствараем у Беларусі".

Пры гэтым, дадаў ён, часта можна пачуць крытыку наконт стварэння так званых гаспадарак-маякоў. Размова ідзе аб перадавой гаспадарцы, якая становіцца своеасаблівым узорам для пераймання. Прадугледжваецца, што іншыя сельскагаспадарчыя прадпрыемствы будуць пераймаць яе вопыт.

"Мяне тут крытыкуюць: Лукашэнка "маякі" ў Беларусі стварае, як у савецкія часы. А чаму не ствараць прыкладна тое, што ты хочаш, каб было ў Беларусі? Таму калі вам гэтыя "маякі" будуць на карысць... Праўда, крытыкуюць мяне тыя, хто збег з краіны. Таксама, як і расійскім уладам дастаецца ад такіх збеглых. Але гэта іх справа. Няхай крытыкуюць, а нам трэба займацца канкрэтнай справай", - канстатаваў Аляксандр Лукашэнка.

Кіраўнік дзяржавы абазначыў і такі напрамак, як сельскагаспадарчая тэхніка: "Без тэхнікі нам не абысціся. Працоўных рэсурсаў і ў вас, і ў нас аднолькава не хапае. Таму трэба механізаваная сельская гаспадарка. Мы гэтым займаемся і можам падзяліцца з вамі вопытам".

"Мы хочам, каб вы ведалі, што ёсць такая блізкая, родная для вас краіна, якая можа матэрыялізаваць усё гэта. Гэта не толькі братэрскія пачуцці, але і вялікая эканоміка, - сказаў Аляксандр Лукашэнка. - Словам, абменьвацца вопытам заўсёды рады. Дзякуй богу, мы размаўляем на адной мове і не плануем размаўляць на якіх-небудзь іншых мовах. Будзем дзяліцца вопытам і неяк рушыць наперад. У тым ліку вырашаць цяжкія задачы, якія ў нас узнікаюць у ходзе нашай жыццядзейнасці".

Кіраўнік дзяржавы таксама адзначыў, што Мінск для губернатара Калужскай вобласці не з'яўляецца чужым горадам: у Вялікую Айчынную вайну тут змагаліся сваякі Уладзіслава Шапшы. "Намаганні, якія вы робіце па абароне гістарычнай памяці, праўды аб Вялікай Айчыннай вайне, звязаны з вашымі ўнутранымі пачуццямі і адчуваннямі. Ваш дзед ваяваў у гады Вялікай Айчыннай вайны, абараняючы нашу вялікую Радзіму. Таму лічыце, што вы прыехалі на сваю зямлю", - сказаў Аляксандр Лукашэнка.

Па выніках мінулага года аб'ём узаемнага гандлю паміж Беларуссю і Калужскай вобласцю склаў $705 млн. Са студзеня па май гэтага года тавараабарот дасягнуў адзнакі $311,4 млн, што складае 117,4% да аналагічнага перыяду мінулага года. Асновай экспарту сталі нафтапрадукты, мэбля і яе часткі, металаканструкцыі з чорных металаў, насенне, смолы і поліўрэтаны, іншыя віды тавараў.

У Беларусь з Калужскай вобласці імпартаваліся пераважна прадукты для кармлення жывёл, палімеры этылену і прапілену, рыбнае філе, алюмініевы дрот і іншае.