29 лістапада, Баку /Міхаіл Маціеўскі - БЕЛТА/. Прэзідэнт Беларусі Аляксандр Лукашэнка сёння на сустрэчы з прэм'ер-міністрам Азербайджана Артурам Расі-задэ абмеркаваў перспектывы развіцця беларуска-азербайджанскіх адносін, перадае карэспандэнт БЕЛТА.
Асаблівая ўвага была звернута на рэалізацыю дамоўленасцей, дасягнутых напярэдадні ў час афіцыйных перагавораў прэзідэнтаў Беларусі і Азербайджана.
Пасля сустрэчы адбыўся нефармальны абед кіраўніка беларускай дзяржавы з прэм'ер-міністрам краіны.
Аляксандр Лукашэнка перад сустрэчай з Артурам Расі-задэ наведаў Цэнтр Гейдара Аліева, які быў створаны ўказам Прэзідэнта Азербайджана Ільхама Аліева і адкрыты ў 2012 годзе.
Цэнтр прызначаны садзейнічаць вывучэнню філасофіі дзяржаўнага будаўніцтва і ідэалогіі азербайджанства Гейдара Аліева, гісторыі краіны, яе мовы, культурных, нацыянальных і духоўных каштоўнасцей.
Комплексны будынак, які ўключае вялікае збудаванне, глядзельную залу, музей, выставачныя залы і адміністрацыйныя памяшканні, узведзены ў постмадэрнісцкім стылі. Канцэпцыя яго форм уяўляе сабой хвалепадобнае імкненне ўвышыню і плаўнае зліццё з зямлёй. Белы колер збудавання сімвалізуе светлую будучыню. У 2014 годзе праект будынка атрымаў прэмію "Дызайн года", заснаваную Лонданскім музеем дызайну. Гэта ўзнагарода з'яўляецца адной з самых аўтарытэтных у галіне архітэктуры.
Збудаванне лічыцца адным з сімвалаў сучаснага Баку.