Галоўныя навіны
Гран-пры "Золата Лістапада" атрымаў паўночнаасецінскі фільм "Паляўнічы"
8 лістапада, Мінск /Кар. БЕЛТА/. Гран-пры XXXI Мінскага міжнароднага кінафестывалю "Лістапад" атрымаў фільм "Паляўнічы" (Расія, рэжысёр Заур Цагоеў), перадае карэспандэнт БЕЛТА з цырымоніі закрыцця кінафестывалю.
Рэжысёр Заур Цагоеў падзякаваў беларускаму народу і зямлі за гасціннасць. "Гэта для нас на самай справе вельмі нечакана, але і прыемна. Перамога важна для нас не толькі як для маладых кінематаграфістаў, але як для прадстаўнікоў Паўночнай Асеціі. Для нашай рэспублікі гэта будзе добры матыватар, каб развівацца ў мастацтве", - сказаў ён.
"На фестывалі я бачыў вядомых дзеячаў савецкага і расійскага кіно, на фільмах якіх вырас. У дзяцінстве я не мог бы сабе ўявіць, што буду калісьці атрымліваць узнагароды або размаўляць з гэтымі вядомымі людзьмі", - дадаў рэжысёр, падкрэсліўшы, што будзе рады бачыць беларускіх кінематаграфістаў у Паўночнай Асеціі і стварыць што-небудзь разам.
Спецыяльны прыз журы конкурсу ігравых фільмаў атрымала кітайская кінакарціна "Весялосць на базары" (рэжысёр Келіму Абулізі), а прыз сімпатый гледачоў - расійскі фільм "Мой дзед" (рэжысёр Святаслаў Уласаў).
Прыз "За лепшае гукавое (музычнае) рашэнне ігравога фільма" прысуджаны Мануэлю Барыёсу і Эдуарда Гансалесу за фільм "Алі Прымера" (Венесуэла). Прыз за лепшую мужчынскую ролю атрымаў народны артыст Беларусі Уладзімір Гасцюхін за фільм "Мой дзед" (Расія), а за лепшую жаночую ролю - Святлана Кручкова за фільм "Двое ў адным жыцці, не лічачы сабакі" (Расія). Уладальнікам прыза за лепшую аператарскую работу імя Юрыя Марухіна стаў Мартэза Кафуры за фільм "Над безданню ў жыце" (Іран), а за лепшую рэжысуру імя Міхаіла Пташука - Крысціян Петцольд за фільм "Адбіткі нумар 3" (Германія).
У конкурсе неігравых фільмаў пераможцам стала карціна "Мікіта" (Расія, рэжысёры Мікалай Бурляеў, Дзмітрый Чарняцоў). Спецыяльны прыз журы конкурсу неігравых фільмаў атрымала кінастужка "Цётухна Ху і яе райскі сад" (Кітай, рэжысёр Пань Чжыцы).
Лепшым фільмам конкурсу анімацыйных стужак стала карціна "Казка Іскаркі" (Расія, рэжысёр Настасся Ліс). Спецыяльны прыз журы конкурсу анімацыйных фільмаў атрымала карціна "Сабачае вуха" (Венгрыя, рэжысёр Петэр Вац).
У намінацыі нацыянальных кінашкол перамагла кінастужка "Але любоў з іх большая" (Расія, рэжысёр Кіра Неміровіч-Данчанка). Прыз за лепшы фільм імя Віктара Турава ў конкурсе "Кіно маладых" атрымаў фільм "Бананавы сад" (Іран, рэжысёр Рэза Кешаварз Хадад). Прыз за лепшую рэжысуру фільма конкурсу "Кіно маладых" імя Валерыя Рубінчыка атрымала кінакарціна "Шчаслівы канец" (Японія, ЗША, рэжысёр Неа Сора).
Лепшым неігравым фільмам нацыянальнага конкурсу стала кінакарціна "Жыццё маё - "Харошкі". Валянціна Гаявая" (Беларусь, рэжысёр Анжаліка Новікава). Прыз за лепшы фільм конкурсу кароткаметражных фільмаў атрымала кітайская кінакарціна "Сапсаваная вясна" (рэжысёр Цю Юй), а дыплом "Па выніках глядацкага галасавання" - фільм "І цяпер я ўступаю" (ЗША, рэжысёр Рані ДэМут).
версія для друку
зрабіць стартавай
дабавіць у выбранае