Гуманітарнае супрацоўніцтва

Гуманітарны груз з кітайскай вакцынай ад COVID-19 даставяць 18 мая ў Беларусь

Фота з архiва

17 мая, Мінск /Кар. БЕЛТА/. З аэрадрома Мачулішчы вылецеў ваенна-транспартны самалёт Іл-76МД па маршруце Мачулішчы - Пекін - Мачулішчы для дастаўкі з Кітая гуманітарнай дапамогі - кітайскай вакцыны ад каранавіруса. Аб гэтым БЕЛТА паведамілі ў Міністэрстве абароны.

"Ваенны экіпаж не першы раз дастаўляе гуманітарныя грузы. У лютым мінулага года Беларусь стала першай краінай, якая па ўказанні Прэзідэнта Аляксандра Лукашэнкі накіравала матэрыяльную гуманітарную дапамогу ў Кітайскую Народную Рэспубліку. Паднябесная таксама аказвала дапамогу Беларусі ў барацьбе з каранавірусам", - расказалі ў Мінабароны.

Агульная працягласць маршруту ваеннага борта складзе 13 600 км. За 20 гадзін палёту экіпаж перасячэ 5 часавых паясоў у кожны бок.

"Беларускіх лётчыкаў з 14 т гуманітарнага грузу чакаюць на радзіме ўжо заўтра", - дадалі ў ведамстве.

Паводле інфармацыі прэс-службы Міністэрства аховы здароўя, КНР перадае Беларусі бязвыплатную дапамогу ў выглядзе 300 тыс. доз вакцыны SARS-CoV-2 Vaccine (Vero Cell) на 150 тыс. чалавек. Вакцыну распрацавала кампанія China National Biotec Group - падраздзяленне буйнейшай кітайскай фармкарпарацыі Sinopharm. Прэпарат будзе перададзены на склад РУП "Белфармацыя" для далейшага размеркавання ў рэгіёны.

У Міністэрстве аховы здароўя таксама адзначылі цеснае супрацоўніцтва медыкаў дзвюх краін. "Нашы ўрачы і вучоныя пастаянна абменьваюцца інфармацыяй аб прымаемых мерах па процідзеянні распаўсюджванню інфекцыі, праводзяць відэаканферэнцыі, абмяркоўваюць метады лячэння і прафілактыкі COVID-19", - паведамляе прэс-служба.

версія для друку

зрабіць стартавай

дабавіць у выбранае