Прэзідэнцкія выбары-2025 у Беларусі
Істотных парушэнняў не зафіксавана. Цэнтр грамадскага назірання за выбарамі аб выніках маніторынгу
27 студзеня, Мінск /Кар. БЕЛТА/. Парушэнняў, здольных паўплываць на ход галасавання ў час прэзідэнцкіх выбараў, не зафіксавана. Аб гэтым на прэс-канферэнцыі ў Цэнтры грамадскага назірання за выбарамі расказаў намеснік старшыні партыі "Белая Русь" Андрэй Басак, перадае карэспандэнт БЕЛТА.
"Усяго на выбары было акрэдытавана 44 тыс. нацыянальных наглядальнікаў, з якіх 35 тыс. - прадстаўнікі грамадскіх аб'яднанняў і палітычных партый. Работа была выбудавана такім чынам, што нашы прадстаўнікі працавалі і ў перыяд датэрміновага, і ў асноўны дзень галасавання на кожным участку па ўсёй краіне. Пачынаючы з 21 студзеня ўся інфармацыя з месцаў аб ходзе галасавання сцякалася ў Цэнтр грамадскага назірання за выбарамі, спецыялісты якога акумулявалі яе ў рэжыме рэальнага часу. Такі фармат работы даў магчымасць бачыць аператыўную карціну з усіх участкаў нашай рэспублікі", - адзначыў Андрэй Басак.
Ён указаў на тое, што парушэнняў, якія маглі б паўплываць на ход галасавання, зафіксавана не было. "У цэлым кампанія па выбарах Прэзідэнта Рэспублікі Беларусь праходзіла спакойна, у штатным рэжыме. Былі зафіксаваны толькі асобныя недахопы", - дадаў намеснік старшыні "Белай Русі".
Андрэй Басак адзначыў, што на ўчастках былі сітуацыі, калі грамадзяне выказвалі сваю аб'ектыўную заўвагу наконт адсутнасці сябе ў спісах для галасавання па месцы рэгістрацыі. "Таксама некаторыя грамадзяне, прыходзячы на ўчасткі для галасавання, скардзіліся на тое, што ім не прыйшлі запрашэнні на выбары. Разам з тым былі парушэнні і з боку саміх выбаршчыкаў. Былі спробы фатаграфавання запоўненых бюлетэняў. Такіх выпадкаў было каля 20. Адзначаны адзінкавыя выпадкі, калі выбаршчыкі правакавалі членаў выбарчых камісій і парушалі грамадскі парадак. Таксама адзін грамадзянін парваў бюлетэнь, які яму быў выдадзены. У кожным з гэтых выпадкаў камісіі адрэагавалі аператыўна ў адпаведнасці з заканадаўствам, паводзілі сябе карэктна і не паддаваліся на правакацыі", - падкрэсліў ён.
Намеснік старшыні "Белай Русі" расказаў, на што ў першую чаргу звярталі ўвагу нацыянальныя наглядальнікі. "Яны звярталі ўвагу на своечасовасць адкрыцця ўчасткаў для галасавання, правільнасць апячатвання скрынь для галасавання, выдачу бюлетэняў. Таксама нашы наглядальнікі кантралявалі, як было арганізавана галасаванне дома, на закрытых участках і працэс падліку галасоў. Наглядальнікі сачылі за тым, каб усе працэдуры праходзілі ў адпаведнасці з выбарчым заканадаўствам. Паводле інфармацыі з участкаў ад нацыянальных наглядальнікаў, парушэнняў пры падліку галасоў выяўлена не было. Члены камісіі дакладна і зладжана працавалі ў адпаведнасці з усімі ўстаноўленымі нормамі", - рэзюмаваў Андрэй Басак.
версія для друку
зрабіць стартавай
дабавіць у выбранае