70-годдзе Вялікай Перамогі

11 мая, Мінск /Кар. БЕЛТА/. Сёння, калі міжнародная супольнасць перажывае складаны крызісны час, гістарычная памяць і адзінства набываюць асаблівую каштоўнасць. Аб гэтым заявіў Прэзідэнт Беларусі Аляксандр Лукашэнка, наведваючы разам са Старшынёй КНР Сі Цзіньпінам Беларускі дзяржаўны музей гісторыі Вялікай Айчыннай вайны, перадае карэспандэнт БЕЛТА.

"Савецкі народ, беларускі народ і Кітай аб'ядноўваюць не толькі шматгадовая дружба і ўсебакова стратэгічнае партнёрства, але і гісторыя баявога братэрства двух народаў у абароне сваіх краін ад агрэсараў. Беларусы і грамадзяне Кітая змагаліся за свабоду сваёй зямлі, за будучыню новых пакаленняў", - адзначыў Прэзідэнт Беларусі.

Аляксандр Лукашэнка звярнуў увагу, што ў музеі цяпер ёсць асобная экспазіцыя "Беларусь і Кітай. Вехі баявога братэрства", якая расказвае аб узаемадзеянні Народна-вызваленчай арміі Кітая і Чырвонай Арміі. "Тут мы бачым удзел у Вялікай Айчыннай вайне кітайскіх патрыётаў", - сказаў кіраўнік дзяржавы. Ён адзначыў, што кітайцы таксама ўдзельнічалі ў антыфашысцкім руху ў Віцебску.

У маі 1945 года капітулявала Германія. "Але Другая сусветная вайна прадаўжалася, і скончылася яна там - на тэрыторыі вялікага Кітая - разгромам Квантунскай арміі. Гэтым быў пакладзены канец японскаму мілітарызму. І зрабілі гэта савецкія войскі разам з Народна-вызваленчай арміяй Кітая", - сказаў Аляксандр Лукашэнка. Ён акцэнтаваў увагу на тым, што Кітай ваяваў цэлых 8 гадоў, страціўшы 35 млн жыццяў кітайскага народа.

Прэзідэнт Беларусі таксама паведаміў, што Старшыня КНР Сі Цзіньпін прыняў рашэнне маштабна адсвяткаваць у гэтым годзе 70-гадовы юбілей Перамогі. "Гэта вялікі залог таго, што гісторыя ніколі не будзе фальсіфікавана, а ваш подзвіг ніколі не будзе забыты", - сказаў Прэзідэнт, звяртаючыся да прысутных ветэранаў. Аляксандр Лукашэнка падкрэсліў, што сёння ён і Старшыня КНР прыйшлі разам у музей, каб пакланіцца загінулым і жывым. "Жадаем кожнаму ветэрану, удзельніку тых падзей, самае галоўнае - здароўя і доўгіх гадоў жыцця. Дзякуй вам!" - сказаў кіраўнік дзяржавы.