Прамовы і інтэрв’ю
Вальфовіч: сістэма забеспячэння нацыянальнай бяспекі гатова да новых выклікаў
Аляксандр Вальфовіч
21 чэрвеня, Брэст /Кар. БЕЛТА/. Сістэма забеспячэння нацыянальнай бяспекі Беларусі гатова да новых выклікаў і пагроз. Аб гэтым заявіў дзяржаўны сакратар Савета бяспекі Аляксандр Вальфовіч на сустрэчы з актывам Брэсцкай вобласці, перадае карэспандэнт БЕЛТА.
"У цэлым сістэма забеспячэння нацыянальнай бяспекі Беларусі гатова да новых выклікаў. Мы робім адпаведныя высновы з той дынамікі ваенна-палітычнай абстаноўкі, якая складваецца сёння вакол нашай краіны, і прымаем адэкватныя рашэнні", - падкрэсліў дзяржсакратар Савета бяспекі.
У пасяджэнні прымаюць удзел кіраўнікі мясцовых органаў улады, сілавых структур і ведамстваў рэгіёна. Сустрэча праходзіць у фармаце канструктыўнага абмену меркаваннямі аб тэндэнцыях развіцця ваенна-палітычнай абстаноўкі на еўрапейскім кантыненце, пагрозах, якія фарміруюцца вакол нашай краіны. Асаблівую ўвагу ўдзельнікі ўдзялілі адказу на гібрыдную вайну, якую праводзіць супраць Беларусі калектыўны Захад.
Аляксандр Вальфовіч адзначыў пашырэнне НАТА і нарошчванне яго ваеннага патэнцыялу ва Усходняй Еўропе. Так, за апошнія два гады колькасць ваенных вучэнняў у Польшчы і краінах Балтыі павялічылася больш як у тры разы, а колькасць іх удзельнікаў - больш як у пяць разоў. Ударнымі тэмпамі развіваецца ваенная інфраструктура альянсу. У еўрапейкіх краінах расходы на абарону ў 2022 годзе павялічыліся на 13 працэнтаў і дасягнулі $480 млрд. Павялічылася колькасць вучэнняў рознага маштабу, актывізавалася разведвальна-падрыўная дзейнасць замежных спецслужбаў у Беларусі.
"Сёння з усёй вастрынёй паўстае пытанне ядзернай пагрозы. І яно ідзе не ад Беларусі і Расійскай Федэрацыі. Яшчэ ў мінулым годзе Злучаныя Штаты Амерыкі прынялі рашэнне правесці рэвізію ядзерных боепрыпасаў на тэрыторыі Еўропы - 150 ядзерных бомбаў там захоўваецца, цяпер праходзіць іх мадэрнізацыя. Дык хто каму пагражае? Вядома ж, у гэтых умовах Беларусь разам з Расіяй робіць стаўку на стратэгічнае стрымліванне - як адну з мер процідзеяння, абароны нацыянальных інтарэсаў", - сказаў дзяржсакратар.
Пры гэтым ваенная дактрына рэспублікі засталася нязменнай - яна па-ранейшаму мае абарончы характар і нацэлена на абарону нацыянальных інтарэсаў беларускага народа. Рашэнне двух кіраўнікоў дзяржаў аб размяшчэнні на тэрыторыі Беларусі тактычнай ядзернай зброі - адна з мер стратэгічнага стрымлівання. "Гэта ўсё нацэлена на тое, каб астудзіць нейкія гарачыя галовы. І гэта абсалютна правільнае, адэкватнае рашэнне для таго, каб захаваць незалежнасць і суверэнітэт рэспублікі, абараніць свой народ. Іншага шляху яны нам проста не пакідаюць", - падкрэсліў Аляксандр Вальфовіч.
Адказам на новыя выклікі і трансфармацыю існуючых пагроз стала распрацоўка новай рэдакцыі Канцэпцыі нацыянальнай бяспекі. Усе яе навелы накіраваны на павышэнне эфектыўнасці дзейнасці суб'ектаў сістэмы забеспячэння нацыянальнай бяспекі Беларусі. Акрамя таго, комплексна ўдасканальваецца заканадаўства ў сферы нацыянальнай бяспекі і абароны. Так, нядаўна ў другім чытанні быў прыняты закон "Аб народным апалчэнні", распрацаваны з улікам вопыту ваеннага канфлікту ва Украіне, зацверджаны папраўкі ў закон "Аб воінскім абавязку і воінскай службе" з удакладненым спісам катэгорый грамадзян, якія маюць права на адтэрміноўку ад прызыву. Акрамя таго, упор робіцца на якасную падрыхтоўку асабовага складу Узброеных сіл, мадэрнізацыю ваеннай тэхнікі і забеспячэнне войскаў яе сучаснымі ўзорамі.
Сустрэча з актывам вобласці арганізавана напярэдадні памятных мерапрыемстваў, прысвечаных 82-й гадавіне пачатку Вялікай Айчыннай вайны, якія пройдуць на досвітку 22 чэрвеня ў мемарыяльным комплексе "Брэсцкая крэпасць-герой". Чакаецца, што дзяржаўны сакратар Савета бяспекі таксама прыме ў іх удзел.
версія для друку
зрабіць стартавай
дабавіць у выбранае