Прамовы і інтэрв’ю

Прэзідэнт Экватарыяльнай Гвінеі заявіў аб гатоўнасці развіваць рэальную кааперацыю з Беларуссю

7 верасня, Мінск /Кар. БЕЛТА/. Экватарыяльная Гвінея гатова развіваць рэальную кааперацыю з Беларуссю. Аб гэтым заявіў журналістам Прэзідэнт Рэспублікі Экватарыяльная Гвінея Тэадора Абіянг Нгема Мбасога па выніках перагавораў з Прэзідэнтам Беларусі Аляксандрам Лукашэнкам у вузкім і пашыраным складах, перадае карэспандэнт БЕЛТА.

Прэзідэнт у першую чаргу асабліва адзначыў удзячнасць беларускаму боку за праяўлены дружалюбны падыход і гатоўнасць да сумеснай працы.

"Мы падзяляем гатоўнасць да рэалізацыі сумеснай эфектыўнай работы, да рэальнай кааперацыі, якая дасць магчымасць нам рэалізаваць патэнцыял нашых краін, - падкрэсліў ён. - Відавочна, што гэта супрацоўніцтва можа стаць своеасаблівай платформай не толькі для таго, каб дапамагчы Экватарыяльнай Гвінеі, але і іншым афрыканскім дзяржавам, якія пакутуюць ад крайняй беднасці".

Тэадора Абіянг Нгема Мбасога ўпэўнены, што незалежнасць, якой шмат гадоў таму дабіліся афрыканскія дзяржавы, да гэтага часу з'яўляецца намінальнай, паколькі многія з іх па-ранейшаму знаходзяцца пад моцным эканамічным націскам. "Мы пакутуем ад залежнасці з боку тых краін, якія ў свой час нас каланізавалі, заходніх краін", - сказаў ён, дадаўшы аб намеры дабівацца сапраўднай эканамічнай незалежнасці, навязаць новы эканамічны парадак. У гэтым плане кааперацыя і супрацоўніцтва з Беларуссю з'яўляюцца, паводле яго слоў, вельмі карыснымі. "Мы прыехалі сюды і хочам атрымаць падтрымку той работы, якую праводзіць Экватарыяльная Гвінея сваімі сіламі, каб забяспечыць трансфармацыю (на афрыканскім кантыненце. - Заўвага БЕЛТА)", - растлумачыў Прэзідэнт.

Ён спадзяецца, што ўсе двухбаковыя дакументы, якія падпісаны ў Мінску падчас афіцыйнага візіту, пяройдуць з тэарэтычнай у практычную плоскасць. "Экватарыяльная Гвінея гатова да таго, каб рэалізаваць усё тое, што падпісана ў рамках гэтай сустрэчы (у Мінску. - Заўвага БЕЛТА)", - сказаў кіраўнік гэтай дзяржавы.

Ён падкрэсліў, што развіццё супрацоўніцтва з Беларуссю будзе на ўзаемавыгаднай аснове і ад гэтага выйграюць і іншыя краіны рэгіёна: "У Афрыцы нядаўна падпісана пагадненне аб свабодным гандлі. Тыя краіны, якія захочуць скарыстацца прадуктамі кааперацыі Беларусі і Экватарыяльнай Гвінеі, будуць абсалютна свабодныя ў іх набыцці".

У ліку прапаноў, агучаных Тэадора Абіянгам Нгемам Мбасога, таксама сумесны ўдзел у гандлёвых альянсах, супольнасцях з магчымасцю выхаду на шырокія рынкі суседніх краін Афрыканскага кантынента.

версія для друку

зрабіць стартавай

дабавіць у выбранае