8 снежня, Ханой /Кар. БЕЛТА/. Лічым Беларусь важным партнёрам у рэгіёне. Аб гэтым сёння заявіў на сустрэчы з прэм'ер-міністрам Беларусі Раманам Галоўчанкам прэм'ер-міністр Сацыялістычнай Рэспублікі В'етнам Фам Мінь Чынь, перадае карэспандэнт БЕЛТА.
Прэм'ер-міністр В'етнама адзначыў, што, выступаючы за стабільнасць і развіццё ў рэгіёне і ў свеце, краіна праводзіць самастойную шматвектарную палітыку, з'яўляецца добрым, надзейным сябрам усіх краін і адказным членам міжнароднай супольнасці.
Пры гэтым Фам Мінь Чынь падкрэсліў, што Беларусь у В'етнаме традыцыйна лічаць сябрам. "Адзін з нашых прыярытэтаў - гэта развіваць адносіны з нашымі традыцыйнымі сябрамі і суседнімі краінамі", - дадаў прэм'ер-міністр В'етнама.
"Для нас Беларусь - гэта верны сябар, мы шануем традыцыйна дружалюбныя адносіны і традыцыйна добрае супрацоўніцтва нашых краін", - сказаў на сустрэчы з Раманам Галоўчанкам Фам Мінь Чынь.
Ён адзначыў, што в'етнамцы адчуваюць вельмі цёплыя пачуцці да беларусаў. "Беларускі народ аказваў нам дапамогу ў гады вайны і цяпер, калі мы будуем і абараняем сваю краіну", - растлумачыў прэм'ер-міністр В'етнама.
Ён дадаў: "Карыстаючыся выпадкам, хацеў бы яшчэ раз падзякаваць ураду і народу Беларусі за тое, што вы нам падарылі медыцынскае абсталяванне ў канцы 2021 года. Вы спецбортам накіравалі нам медыцынскае абсталяванне, мы тады мелі патрэбу ў гэтым абсталяванні".
Як заявіў прэм'ер-міністр В'етнама, тут гатовы да шматбаковага супрацоўніцтва з Рэспублікай Беларусь.
"Мы лічым Беларусь важным партнёрам у рэгіёне і хочам развіваць існуючыя сувязі", - падкрэсліў прэм'ер-міністр Сацыялістычнай Рэспублікі В'етнам.
Пасля перагавораў прэм'ер-міністры Беларусі і В'етнама прынялі ўдзел ва ўрачыстай цырымоніі падпісання і абмену дакументамі аб супрацоўніцтве паміж В'етнамам і Беларуссю.
У прыватнасці, сёння ў Ханоі было падпісана пагадненне паміж урадам Рэспублікі Беларусь і ўрадам СРВ аб узаемнай адмене віз.