Прамовы і інтэрв’ю

Лукашэнка заявіў, што трэба паглыбляць узаемадзеянне АДКБ з ААН, ШАС, іншымі міжнароднымі арганізацыямі

20 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка на сустрэчы з міністрамі замежных спраў дзяржаў - членаў АДКБ заявіў аб неабходнасці паглыбляць узаемадзеянне з ААН, ШАС, іншымі міжнароднымі арганізацыямі, перадае карэспандэнт БЕЛТА.

"Нам трэба паглыбляць узаемадзеянне АДКБ з ААН, ШАС, іншымі міжнароднымі арганізацыямі", - сказаў беларускі лідар.

Прэзідэнт нагадаў, што ў ліпені старшынства ў ШАС пяройдзе да Казахстана, які будзе старшынёй у АДКБ у 2024 годзе. "Цікавая канфігурацыя атрымліваецца. Гэта добрая магчымасць, каб забяспечыць эфектыўнае сінергетычнае ўзаемадзеянне дзвюх арганізацый. У Казахстана дастаткова спецыялістаў і вопыту для таго, каб з гэтага адзінага старшынства атрымаць карысць", - адзначыў ён.

"Нам трэба часцей выступаць ад імя АДКБ на міжнародных пляцоўках, каб гэты голас гучаў. Вядома, нас спецыяльна не хочуць чуць. Мы як косць у горле для некага - то НАТА, то Еўрасаюзу, то амерыканцам разам з імі. Але тым не менш голас наш як ваенна-палітычнага блока павінен гучаць", - звярнуў увагу Аляксандр Лукашэнка.

Яшчэ адзін аспект, на якім спыніўся кіраўнік дзяржавы, - неабходнасць нарошчвання інфармацыйна-аналітычнага патэнцыялу АДКБ. "Аднак сур'ёзных вынікаў пакуль не відаць, - канстатаваў беларускі лідар. - Нам нічога не перашкаджае. Думаю, на сённяшнім савеце (пасяджэнні СМЗС АДКБ. - Заўвага БЕЛТА) вы маглі б пашукаць адказ на гэта пытанне".

"Сёння мы ўсе знаходзімся ў зоне баявых дзеянняў інфармацыйна-псіхалагічных аперацый, мы асабліва гэта адчуваем, у тым ліку і Расія апошнім часам гэта адчула. Ды і вы таксама. Мы ад гэтага нікуды не дзенемся. Нам трэба навучыцца нарошчваць свае намаганні ў інфармацыйна-аналітычным полі і ў супрацоўніцтве са сродкамі масавай інфармацыі", - падкрэсліў Аляксандр Лукашэнка.

Узровень аналітыкі і прагнозу трэба павышаць, каб забяспечваць краіны-члены, а таксама кіраўнікоў дзяржаў сур'ёзнымі матэрыяламі, у тым ліку прагнознага характару, перакананы Прэзідэнт. "Што датычыцца прадастаўлення інфармацыі, у нас наогул няма ніякіх праблем у супрацоўніцтве з вамі (не толькі з Расіяй - тут у нас наогул сумесныя дзеянні), - адзначыў ён. - Любую інфармацыю, якая датычыцца вашых дзяржаў - у нас гэта закон - мы накіроўваем або прэзідэнтам, або ў МЗС, або спецслужбам. Мы так будзем рабіць і ў далейшым".

версія для друку

зрабіць стартавай

дабавіць у выбранае