Прамовы і інтэрв’ю

Лукашэнка не лічыць адносіны з Украінай безнадзейна сапсаванымі

18 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка не лічыць, што адносіны Расіі з Украінай, таксама як і Беларусі з гэтай краінай, безнадзейна сапсаваны. У гэтым рэчышчы ён выказаўся ў інтэрв'ю ўкраінскай журналістцы Дзіяне Панчанка, паведамляе БЕЛТА.

Кіраўнік дзяржавы адказаў на пытанне журналісткі, якое датычылася тэзіса аб усё ўзрастаючай нянавісці паміж народамі, у прыватнасці ўкраінцаў у адносінах да рускіх.

"Усё гэта бачылася, хутчэй за ўсё, выказваю свой пункт гледжання, не так. Сёння мы паразумнелі, атрымліваючы ўрокі на сённяшні дзень з гэтых падзей. Так, усё, пра што вы сказалі, гэта мае месца. Мы раззлавалі народы. Акрамя таго, нам здаецца непрымірымай пазіцыя ўкраінцаў, расіян. Ды і беларусы тут уцягнуты ў гэта", - сказаў кіраўнік дзяржавы.

Аляксандр Лукашэнка адзначыў, што ў сувязі з гэтым заўсёды прыводзіць прыклад зверстваў, якія чынілі фашысты ў гады Вялікай Айчыннай вайны. "Але зарубцаваліся раны. Савецкі Саюз меў добрыя адносіны з Германіяй. І Украіна, і Беларусь, якую практычна спаласавалі, сцерлі з зямлі, выбудавала адносіны з Германіяй. Чаму мы не выбудуем (адносіны з Украінай пасля заканчэння ваеннага процістаяння. - Заўвага БЕЛТА)? Выбудуем. Але да гэтага трэба ісці", - падкрэсліў беларускі лідар.

"Калі мы будзем аб гэтым гаварыць, але ісці да гэтага не будзем, наўрад ці мы што-небудзь зробім. Да гэтага трэба ісці. І першы крок - сесці за стол перагавораў. Ну, першы дзень будзем глядзець адзін на аднаго, як звяры. А потым усё ж такі пачнём размаўляць. Гэтак жа было ў Гомелі, у Белавежскай пушчы, у Стамбуле (размова аб праведзеных раўндах расійска-ўкраінскіх перагавораў у 2022 годзе. - Заўвага БЕЛТА). Так было. Пачыналася так, што іскрыла, ды яшчэ як! Агонь палаў! А потым пачалі абмяркоўваць канкрэтныя пытанні. Але амерыканцы сказалі Валодзю Зяленскаму: "Стоп, ваюем!" - сказаў Прэзідэнт.

Ён упэўнены, што толькі за сталом перагавораў можна знайсці развязкі сітуацыі, і рабіць гэта трэба з удзелам усіх уцягнутых бакоў і ўладных людзей. "Не так, як у Саудаўскай Аравіі сабраліся (перагаворы аб мірным урэгуляванні ва Украіне, якія прайшлі ў пачатку жніўня бягучага года з удзелам шэрага краін. - Заўвага БЕЛТА). І Расіі там няма. Гэта што за перагаворы і размовы? Аб чым вы дамаўляцца вырашылі за спінай у галоўнай дзеючай асобы? Гэта значыць тыя, хто ўцягнуты. Тыя, хто адчуваюць, што яны там павінны быць за сталом перагавораў, яны павінны быць", - рэзюмаваў Аляксандр Лукашэнка.

версія для друку

зрабіць стартавай

дабавіць у выбранае