Прамовы і інтэрв’ю

Лапіцкі: прапіска "Славянскага базару" застанецца віцебскай, але мы будзем сябраваць з іншымі фестывалямі

13 ліпеня, Віцебск /Алеся Пушнякова - БЕЛТА/. У "Славянскага базару" заўсёды будзе віцебская прапіска, але дырэкцыя форуму мастацтваў адкрыта да супрацоўніцтва і будзе ўзаемадзейнічаць з іншымі фестывалямі, якія падзяляюць ідэі міру і стварэння. Аб гэтым на адкрыцці Міжнароднага прэс-цэнтра паведаміў генеральны дырэктар Цэнтра культуры "Віцебск", дырэктар "Славянскага базару ў Віцебску" Глеб Лапіцкі, перадае карэспандэнт БЕЛТА.

Адказваючы на пытанне журналісткі са Смаленска, ці будуць адкрыты філіялы фестывалю ў іншых краінах, Глеб Лапіцкі адзначыў, што такой неабходнасці няма.

"У гісторыі "Славянскага базару" былі розныя часы. Чаму ў яго з'явілася дапаўненне "ў Віцебску"? Таму што "Славянскі базар" - гэта ўсё ж такі месца. Ён шмат чым адрозніваецца ад фестываляў, з якімі нас спрабуюць параўноўваць. І ніводны іншы праект не асацыюецца з месцам. Прапіска "Славянскага базару" будзе заўсёды віцебская, але мы гатовы сябраваць з тымі людзьмі і фестывалямі, якія падзяляюць нашы погляды", - сказаў гендырэктар ЦК "Віцебск".

Прапрацоўваецца ідэя больш цеснага ўзаемадзеяння "Славянскага базару" з расійскім форумам "Залаты Віцязь".

"Мы паставілі пытанне, каб Саюзная дзяржава набыла яшчэ адзін магутны акорд у Маскве праз славянскі форум "Залаты Віцязь". У ім заўсёды ўдзельнічалі беларусы, прывозілі лепшыя спектаклі і фільмы. Гэта будзе прадоўжана", - сказаў старшыня Камісіі Парламенцкага сходу па культуры, навуцы і адукацыі Саюза Беларусі і Расіі, першы намеснік старшыні Камітэта Дзярждумы Расіі па развіцці грамадзянскай супольнасці, пытаннях грамадскіх і рэлігійных аб'яднанняў Мікалай Бурляеў.

версія для друку

зрабіць стартавай

дабавіць у выбранае