Прамовы і інтэрв’ю

Качанава: супрацоўніцтва з Татарстанам развіваецца па ўсіх напрамках

Наталля Качанава

2 лютага, Мінск /Кар. БЕЛТА/. Супрацоўніцтва з Татарстанам развіваецца па ўсіх напрамках, заявіла старшыня Савета Рэспублікі Наталля Качанава на сустрэчы з дэлегацыяй Дзяржаўнага савета Рэспублікі Татарстан на чале са старшынёй савета Фарыдам Мухаметшыным, перадае карэспандэнт БЕЛТА.

"Рэспубліку Беларусь і Рэспубліку Татарстан звязваюць добрыя, дружалюбныя адносіны - у гэтым няма ніякага сумнення. Наша супрацоўніцтва развіваецца абсалютна па ўсіх напрамках. Пацвярджэнне таго - шматлікія візіты, якія праходзяць у нашу рэспубліку, і той тавараабарот, які сёння ёсць паміж нашымі рэспублікамі", - сказала Наталля Качанава.

Паводле слоў спікера, развіваецца супрацоўніцтва па лініі ўрадаў і асобных міністэрстваў, у тым ліку ў сферы сельскай гаспадаркі. З беларускага боку актыўныя канцэрны "Белнафтахім", "Беллегпрам", "Белдзяржхарчпрам". Разам з тым, паводле слоў Наталлі Качанавай, яшчэ наперадзе сур'ёзная работа.

Старшыня Савета Рэспублікі заўважыла, што сённяшняя сустрэча праходзіць напярэдадні важных палітычных падзей у Беларусі і Расіі. Таксама гэты год адзначаны знакавай датай - 80-годдзем вызвалення Беларусі ад нямецка-фашысцкіх захопнікаў, у сувязі з чым у краіне будуць праходзіць святочныя мерапрыемствы, на якіх спікер была б рада бачыць і гасцей з Татарстана. Наталля Качанава нагадала, што ў Беларусі нядаўна адзначалі 80-годдзе вызвалення Ленінграда ад блакады.

Асобна спікер спынілася на маючым адбыцца Форуме рэгіёнаў Беларусі і Расіі, які ў бягучым годзе пройдзе 27-28 чэрвеня ў Віцебску, Полацку і Наваполацку. "Мы хочам паказаць вам не толькі прамысловы, але і культурны патэнцыял нашай краіны, вытокі нашай дзяржаўнасці, - сказала яна. - Мы спадзяёмся, што дэлегацыя Татарстана будзе прысутнічаць на Форуме рэгіёнаў. Мы будзем падпісваць новыя кантракты і пагадненні, над якімі працуюць ужо калегі ва ўсіх абласцях нашай краіны".

Наталля Качанава звярнула ўвагу і на важнасць супрацоўніцтва моладзі дзвюх рэспублік. Спікер расказала, што пры Нацыянальным сходзе Беларусі створаны маладзёжны савет. "Наша моладзь актыўна працуе з моладдзю з Расійскай Федэрацыі. Ужо трэці год будзе рэалізоўвацца праект "Поезд памяці", - адзначыла яна.

Гаворачы пра гэты патрыятычны праект, спікер расказала, што ў мінулым годзе, акрамя моладзі з Беларусі і Расіі, у ім удзельнічалі прадстаўнікі Кыргызстана і Арменіі. А ў гэтым годзе плануецца падключыць Азербайджан. Акрамя таго, вядзецца работа з Казахстанам і Узбекістанам.

Вяртаючыся да тэмы візіту дэлегацыі, старшыня Савета Рэспублікі выказала надзею, што ён будзе плённым. "Шчыра жадаем вам паспяховага знаходжання ў нас у Беларусі", - сказала яна.

версія для друку

зрабіць стартавай

дабавіць у выбранае