Прамовы і інтэрв’ю

Качанава: работу па інклюзіўнай адукацыі трэба развіваць ва ўсіх рэгіёнах

2 жніўня, Гомель /Кар. БЕЛТА/. Работу па інклюзіўнай адукацыі ў Гомелі і вобласці трэба ўзяць за аснову і развіваць у іншых рэгіёнах. Акцэнт на гэтым зрабіла старшыня Савета Рэспублікі Наталля Качанава на пасяджэнні кансультатыўнага савета пры Савеце Рэспублікі па пытаннях сацыяльнай адаптацыі і інтэграцыі дзяцей з асаблівасцямі псіхафізічнага развіцця, якое праходзіць у Гомелі, перадае карэспандэнт БЕЛТА.

Наталля Качанава напярэдадні пасяджэння вывучыла работу Гомельскага дома-інтэрната для дзяцей-інвалідаў з асаблівасцямі псіхафізічнага развіцця, гарадскога цэнтра інклюзіўнай культуры. Спікер дала высокую ацэнку рабоце ўстаноў. "Тое, што мы ўбачылі, мне спадабалася. І тое, што робіцца ў Гомелі і Гомельскай вобласці па рабоце з дзецьмі, па інклюзіўнай адукацыі, трэба ўзяць за аснову, якую мы павінны развіваць у іншых рэгіёнах", - падкрэсліла старшыня Савета Рэспублікі.

Наталля Качанава нагадала: кансультатыўны савет быў створаны зыходзячы з таго, што ў Савет Рэспублікі звярталіся людзі, якія выхоўваюць дзяцей з расстройствамі аўтыстычнага спектра, СДУГ, і гаварылі аб праблемах рэабілітацыі дзяцей, далейшай іх сацыялізацыі, навучанні.

"У нас у краіне выбудавана даволі зладжаная сістэма, якая вызначана заканадаўча пастановамі міністэрстваў. Мы ўбачылі, што мы робім усё правільна, але часам чалавек губляецца ў сітуацыі і не ведае, дзе яму знайсці дапамогу, куды яму са сваёй праблемай звярнуцца", - падкрэсліла спікер, адзначыўшы, што для вырашэння комплексу пытанняў па гэтым напрамку і быў створаны кансультатыўны савет.

Гаворачы аб далейшых планах работы кансультатыўнага савета, Наталля Качанава адзначыла: "Будзем на пасяджэнні запрашаць бацькоў, сем'і, у якіх ёсць праблемы. І ўсе разам будзем абмяркоўваць, што нам яшчэ трэба зрабіць".

Паводле слоў Наталлі Качанавай, да вырашэння пытанняў падключыліся ўжо прадстаўнікі ўстаноў, арганізацый розных напрамкаў. Так, напрыклад, для ранняга выяўлення праблем са здароўем распрацавана спецыяльная анкета, і такое анкетаванне маем намер шырока ўкараніць у практыку.

Спікер падкрэсліла і выключную важнасць інклюзіўнай адукацыі. "Калі мы будзем рабіць усё, як прапісана ў нашых законах, зробім усё, каб кожнае дзіця, у якога няхай і ёсць нейкія праблемы, але яно можа спяваць, маляваць, займацца вырабам сувенірнай прадукцыі, гэта будзе цудоўна", - упэўнена яна.

"І мы гаворым не толькі пра дзяцей, а ў цэлым пра тых людзей, якія маюць такія расстройствы. Гэтыя людзі могуць і павінны жыць у соцыуме, павінны вучыцца, развівацца, працаваць", - рэзюмавала Наталля Качанава. 

версія для друку

зрабіць стартавай

дабавіць у выбранае