Падзеі, факты, анонсы

"Важна паказаць, наколькі багата наша нацыя". У Мінску прэзентавалі збор твораў Кузьмы Чорнага

Фота з архiва

27 верасня, Мінск /Кар. БЕЛТА/. У Інстытуце літаратуразнаўства імя Янкі Купалы Цэнтра даследаванняў беларускай культуры, мовы і літаратуры НАН Беларусі прадставілі першы том збору твораў класіка беларускай літаратуры Кузьмы Чорнага, перадае карэспандэнт БЕЛТА.

Збор твораў плануецца да выдання ў 12 тамах.

"Кузьма Чорны пакінуў вялікі след у беларускай літаратуры і быў вядомы глыбокай сувяззю з паўсядзённым жыццём народа, любоўю да сваёй радзімы і каранёў, цудоўным валоданнем роднай мовай і разуменнем чалавечай душы. Кузьма Чорны стаў адным са стваральнікаў нацыянальнай сацыяльна-псіхалагічнай і інтэлектуальна-філасофскай прозы", - сказаў дырэктар Цэнтра даследаванняў беларускай культуры, мовы і літаратуры Нацыянальнай акадэміі навук Беларусі Аляксандр Лакотка.

"У першы том збору выдавецтва "Беларуская навука" ўвайшлі раннія творы класіка 1921-1923 гадоў, якія друкуюцца ў адпаведнасці з далейшай творчай воляй аўтара. Першы том змяшчае ў сабе гісторыка-літаратурныя, тэксталагічныя і іншыя навуковыя каментарыі. У час падрыхтоўкі выдання былі выкарыстаны новыя дакументы і архіўныя матэрыялы, якія захоўваюцца ў Нацыянальнай бібліятэцы Беларусі, Цэнтры даследаванняў беларускай культуры, мовы і літаратуры Нацыянальнай акадэміі навук Беларусі, Беларускім дзяржаўным архіве-музеі літаратуры і мастацтва, а таксама ў прыватным архіве наследнікаў пісьменніка", - дадаў ён.

Дырэктар філіяла "Інстытут літаратуразнаўства імя Янкі Купалы" Цэнтра даследаванняў беларускай культуры, мовы і літаратуры НАН Беларусі Іван Саверчанка адзначыў, што вяршыняй творчасці Кузьмы Чорнага лічыць раман "Зямля". "Гэты раман уражвае маштабнасцю і шматграннасцю, а таксама ўважлівасцю да беларускай прыроды. Пісьменніцкае майстэрства Чорнага - непераўзыдзены ўзор стылістычнага таленту", - падкрэсліў Іван Саверчанка.
 
Дырэктар Інстытута мовазнаўства імя Якуба Коласа НАН Беларусі Ігар Капылоў падзякаваў усім, хто ўдзельнічаў у выданні зборніка. "На жаль, далёка не кожны можа ўявіць, колькі працы ўкладзена ў гэту работу. Нам не сорамна за прадукцыю нашага выдавецтва. Сёння, калі на высокім дзяржаўным узроўні ставяцца пытанні патрыятычнага выхавання, вельмі важна паказаць, наколькі багата наша нацыя. Менавіта Кузьма Чорны выдатна паказаў псіхалогію, менталітэт і філасофію народа", - падкрэсліў Ігар Капылоў.

"Выданні нашага аддзела тэксталогіі маюць працяг свайго жыцця ў мовазнаўстве. Цяпер мы працуем над стварэннем новага тлумачальнага слоўніка беларускай мовы і ўдзячныя тэкстолагам, якія дзеляцца з намі матэрыяламі, таму што значэнні розных слоў будуць ілюстравацца з дапамогай сказаў са зборнікаў твораў класікаў", - рэзюмаваў Ігар Капылоў.

У ходзе мерапрыемства таксама адкрылася кніжная выстава "Кузьма Чорны: пра чалавека, пра беларускае, пра галоўнае".

версія для друку

зрабіць стартавай

дабавіць у выбранае