Падзеі, факты, анонсы

"Усё жыццё і лёс". Да свайго юбілею БЕЛТА прэзентавала кнігу "105 гадоў навін"

21 снежня, Мінск /Кар. БЕЛТА/. Беларускае інфармацыйнае агенцтва імкліва развіваецца ў сучасных умовах, аднак пры гэтым захоўвае традыцыі, закладзеныя папярэднікамі. Аб гэтым журналістам заявіла генеральны дырэктар БЕЛТА Ірына Акуловіч на ўрачыстым мерапрыемстве, прысвечаным 105-годдзю агенцтва, перадае карэспандэнт БЕЛТА.

Урачыстае мерапрыемства, прысвечанае 105-годдзю БЕЛТА, прайшло 20 снежня ў Палацы Рэспублікі. Госці свята маглі азнаёміцца з дзвюма фотавыставамі БЕЛТА. Першая - "Навіны складаюць гiсторыю". Гэта чорна-белыя архіўныя фатаграфіі, якія расказваюць пра шлях, які прайшла краіна з 1920-1930-х гадоў і да 1990-х. Другая - "Суверэнная Беларусь" - расказвае пра тры дзесяцігоддзі суверэннага будаўніцтва і дасягненняў незалежнай Беларусі.

Цікавасць у гасцей выклікала і рэтраабсталяванне, на якім супрацоўнікі агенцтва працавалі ў 1940-1980-я гады - тэлеграф Морзэ, тэлетайпы, старт-стопныя машыны, першыя дыктафоны і г.д. Спецыяльна для гасцей запусцілі і тэлеграфную машыну 1960 года, якая перадавала святочныя паведамленні з нагоды юбілею БЕЛТА.

Павіншаваць калектыў галоўнага інфармацыйнага агенцтва краіны прыйшлі прадстаўнікі розных міністэрстваў і ведамстваў.

Намеснік кіраўніка Адміністрацыі Прэзідэнта Беларусі Ігар Луцкі, які ў свой час таксама працаваў у БЕЛТА, адзначыў моцную работу журналістаў. "Мне пашанцавала працаваць у інфармацыйным агенцтве. Хачу сказаць, што агенцтва - гэта моцная індывідуальная работа журналіста, дзе праяўляецца яго высокі клас і маральна-псіхалагічная падрыхтоўка, жаданне быць у патоку навін 24/7. Гэтым і вызначаюцца журналісты БЕЛТА", - сказаў Луцкі. Ён падзякаваў калектыву за прафесійную работу і пажадаў і ў далейшым паспяхова працаваць на карысць краіны.

Ігар Луцкі таксама зачытаў віншаванне калектыву БЕЛТА са 105-годдзем ад кіраўніка дзяржавы.

Ад Савета Рэспублікі Нацыянальнага сходу Рэспублікі Беларусь супрацоўнікаў БЕЛТА з юбілеем павіншаваў намеснік старшыні Валерый Бельскі. "Як пастаянны чытач я адзначаю высокую атрактыўнасць сайта, якая дазваляе знайсці любую інфармацыю. Вашы навіны чытаюць ва ўсім свеце і водгукі ідуць усюды. Нездарма вы стаіце на варце нашай інфармацыйнай бяспекі, і ў вас гэта добра атрымліваецца", - сказаў ён.

Кожны год, кожны месяц і кожны дзень на працягу 105 гадоў БЕЛТА піша гісторыю Беларусі, адзначыў першы намеснік дзяржаўнага сакратара Савета бяспекі Беларусі Павел Муравейка. Ён перадаў калектыву агенцтва віншавальны адрас дзяржсакратара Савета бяспекі і ўручыў граматы і падзякі за сумесную работу. "БЕЛТА заўсёды адлюстроўвала інфармацыю аб'ектыўна і справядліва. Калектыў Савета бяспекі цэніць тое цеснае ўзаемадзеянне, якое склалася паміж намі", - падкрэсліў Павел Муравейка.

Міністр абароны Віктар Хрэнін абазначыў, што зброя журналістаў ва ўсе часы застаецца нязменнай - гэта слова. "Вы змагаліся ёю на франтах Вялікай Айчыннай вайны. Словам вы будавалі суверэнную Беларусь, адстойвалі нашу любімую Радзіму ў 2020 годзе. Карэспандэнты БЕЛТА і сёння сапраўдныя салдаты. Сапраўдныя байцы інфармацыйнай вайны, разгорнутай супраць нашай дзяржавы. Вы стойка трымаеце абарону ў бітве за грамадскую думку беларусаў, за свабодную, светлую і мірную будучыню нашых грамадзян", - сказаў ён.

Уручаючы генеральнаму дырэктару БЕЛТА Ірыне Акуловіч макет зброі, Віктар Хрэнін адзначыў сімвалічнасць такога падарунка: "Вінтоўка Мосіна - адзін з самых легендарных відаў стралковай зброі, з якой ваявалі салдаты ў войнах першай палавіны ХХ стагоддзя. Яна заўсёды славілася высокай прыцэльнай далёкасцю і дакладнасцю пападання. Навіны карэспандэнтаў БЕЛТА маюць такія ж характарыстыкі: яны стратэгічна дальнабачныя, б'юць дакладна ў цэль і лаканічныя".

У адрас калектыву БЕЛТА таксама шмат цёплых слоў сказаў міністр энергетыкі Віктар Каранкевіч. Ён адзначыў, што ў медыйнай прасторы краіны БЕЛТА ўпэўнена займае лідзіруючыя пазіцыі, з'яўляючыся надзейнай крыніцай аб'ектыўнай і дакладнай інфармацыі аб падзеях у Беларусі і за яе межамі. "Гэта вельмі аўтарытэтны брэнд, якому давяраюць мільёны людзей, - сказаў ён. - Супрацоўніцтва інфармагенцтва з Міністэрствам энергетыкі развіваецца не толькі ў частцы работы па распаўсюджванні інфармацыі аб дзейнасці арганізацый галіны, сумесна таксама рыхтуюцца цікавыя, важныя для грамадства мультымедыйныя праекты. Залатым фондам агенцтва па праву лічыцца яго калектыў. Гэта высокакваліфікаваныя прафесіяналы з вялікім вопытам і глыбокімі ведамі, адданыя сваёй справе".

Павіншаваць супрацоўнікаў БЕЛТА прыйшлі таксама міністр юстыцыі Сяргей Хаменка і міністр прамысловасці Аляксандр Рагожнік, старшыня Беларускай гандлёва-прамысловай палаты Міхаіл Мятлікаў.

Міністр аховы здароўя Дзмітрый Піневіч, віншуючы работнікаў агенцтва, адзначыў, што аператыўнасць, дакладнасць і лаканічнасць - фірменны стыль БЕЛТА.

Узнагароды калектыву БЕЛТА за вялікі асабісты ўклад у развіццё і ўмацаванне супрацоўніцтва дзяржаў - удзельніц Садружнасці Незалежных Дзяржаў у сферы інфармацыйнага ўзаемадзеяння ўручыў першы намеснік генеральнага сакратара СНД Леанід Анфімаў. Ён таксама перадаў Ірыне Акуловіч прывітальны адрас ад генеральнага сакратара СНД Сяргея Лебедзева.

Ад імя дзяржаўнага сакратара Саюзнай дзяржавы Дзмітрыя Мезенцава павіншавала агенцтва з юбілеем кіраўнік прадстаўніцтва Пастаяннага камітэта Саюзнай дзяржавы ў Мінску Мар'яна Шчоткіна.

Віншаванні і ўзнагароды атрымалі белтаўцы таксама ад Міністэрства інфармацыі. Намеснік міністра інфармацыі Ігар Бузоўскі падкрэсліў, што БЕЛТА на постсавецкай прасторы - адно з самых яркіх інфармагенцтваў. "Для мяне значна, што БЕЛТА як калектыў захоўвае глыбокія традыцыі беларускага народа, фарміруе сэнс будучыні", - сказаў ён.

Сярод гасцей юбілейнай урачыстасці - прадстаўнікі Кіраўніцтва справамі Прэзідэнта, Міністэрства сувязі і інфарматызацыі, Мінкультуры і Мінспорту, Мінгарвыканкама, МНС, НАК, ФПБ і іншыя.

Яшчэ адзін падарунак агенцтву - аднагалоснае рашэнне сакратарыята Беларускага саюза журналістаў прысвоіць ганаровае званне "Заслужаны журналіст" гендырэктару інфармагенцтва Ірыне Акуловіч. Аб гэтым на ўрачыстым сходзе аб'явіў кіраўнік БСЖ Андрэй Крывашэеў, абазначыўшы яе значны ўклад у развіццё айчыннай медыясферы і стварэнне на базе інфармагенцтва ўнікальнай нацыянальнай школы мультымедыйнай журналістыкі.

Генеральны дырэктар БЕЛТА выказала ўсім словы ўдзячнасці за актыўнае ўзаемадзеянне з агенцтвам, адзначыўшы, што ўсе разам выконваем адну важную задачу. "БЕЛТА была, ёсць і будзе самай аператыўнай і дакладнай крыніцай інфармацыі. Такая сутнасць інфармацыйнага агенцтва. Наша задача - гэтаму адпавядаць", - падкрэсліла яна і дадала, што сёння агенцтва імкліва развіваецца, але пры гэтым захоўвае традыцыі, якія былі закладзены папярэднікамі.

Яна таксама расказала, што да свайго юбілею БЕЛТА правяла вялізную работу. Яе вынікам стала ўнікальная кніга "105 гадоў навін", якая прэзентавана ў рамках святкавання юбілею. Упершыню за стагоддзе калектыў агенцтва сабраў разам уласную гісторыю. "У гэтым выданні - усё жыццё і лёс буйнейшага інфармацыйнага агенцтва краіны", - падкрэсліла Ірына Акуловіч.

Генеральны дырэктар БЕЛТА разам з дырэктарам выдавецкага дома "Беларусь сегодня" Дзмітрыем Жуком, які 15 гадоў узначальваў Беларускае тэлеграфнае агенцтва, распісаліся ў экзэмпляры кнігі "105 гадоў навін", які будзе перададзены на захоўванне ў Музей беларускай дзяржаўнасці.

версія для друку

зрабіць стартавай

дабавіць у выбранае