20 ліпеня, Мінск /Кар. БЕЛТА/. У "Мінскім трыятлоне-2023" чакаецца каля 1500 удзельнікаў. Спаборніцтвы пройдуць ужо шосты раз. Аб гэтым расказаў журналістам старшыня Беларускай федэрацыі трыятлона Дзмітрый Талкачоў, перадае карэспандэнт БЕЛТА.
Акрамя беларусаў, за ўзнагароды паспрачаюцца спартсмены з некалькіх рэгіёнаў Расіі, а таксама госці з ЗША, Кітая, Азербайджана і іншых краін. У нядзелю, 30 ліпеня, у галоўнай катэгорыі "Палавінка" спартсменам трэба будзе праплыць 1900 м, потым праехаць 90 км на веласіпедзе і завяршыць спаборніцтвы кросам на 21 км. У намінацыі "Алімпійка" дыстанцыі ў трох дысцыплінах будуць у два разы карацейшыя, у "Спрынце" - у чатыры разы. Акрамя таго, пройдуць эстафеты карпаратыўных каманд, дзіцячы забег TriKids на 500 м, а таксама жаночы забег Minsk Lady Run на 3 км.
Па сфарміраванай ужо традыцыі плавальныя спаборніцтвы адбудуцца на Мінскім моры, маршрут велагонкі пройдзе па праспектах Пераможцаў і Незалежнасці, бегавы этап - па набярэжнай Свіслачы праз парк Перамогі з фінішам каля Палаца спорту, паведаміў Дзмітрый Талкачоў.
Ён таксама адзначыў, што перад стартам усе ўдзельнікі атрымаюць спецыяльны пакет, у які ўвойдуць плавальная шапачка, сумка-рукзак, стартавы нумар, чып электроннай адзнакі і падарункі ад партнёраў. На фінішы пераможцаў чакаюць медалі, майкі фінішораў і аднаўленчыя мерапрыемствы. Усім удзельнікам будзе прадастаўлена магчымасць бясплатнага трансферу да месца старту, а таксама сэрвісу веласіпедаў напярэдадні і ў час гонкі.
Першы "Мінскі трыятлон" прайшоў у 2018 годзе, і з кожным годам яго папулярнасць расце. Тады ў ім выступілі ўсяго каля 300 спартсменаў, а цяпер іх у пяць разоў больш.
Трыятлон упершыню быў уключаны ў праграму Алімпійскіх гульняў у 2000 годзе ў Сіднеі. На Алімпіядах атлеты плывуць 1500 м, праязджаюць на веласіпедзе 40 км і бягуць 10 км. Гэты від лічыцца адным з самых складаных, паколькі спартсменам даводзіцца пераадольваць дыстанцыі ў любое надвор'е. І не дарэмна трыятланістаў называюць жалезнымі людзьмі.