Падзеі, факты, анонсы

Тэатральная раніца для ўсёй сям'і пройдзе 15 кастрычніка ў Вялікім тэатры Беларусі

Фота bolshoibelarus.by

9 кастрычніка, Мінск /Кар. БЕЛТА/. На Тыдні бацькоўскай любові ў Вялікім тэатры Беларусі пройдзе новая акцыя "Тэатральная раніца для ўсёй сям'і", паведамілі БЕЛТА ў Вялікім.

У нядзелю 15 кастрычніка тэатр адчыніць свае дзверы для дзяцей, зоны і гасціныя ў фае тэатра будуць аформлены дэкарацыямі і рэквізітам з дзіцячых і казачных спектакляў тэатра, дзе дзеці змогуць пазнаёміцца з артыстамі тэатра і сфатаграфавацца з любімымі персанажамі.

Дзіўны свет Вялікага тэатра для юных гледачоў будзе адкрыты з 11.00 да 15.00. Дзеці змогуць паўдзельнічаць у майстар-класах па стварэнні эскіза або макета, а таксама па стварэнні дзіўнага рэквізіту. Можна будзе апынуцца ў адной казцы з Васілісай Прамудрай і Кашчэем Бессмяротным, пабываць на чырвонай дарожцы і зрабіць прыгожае сэлфі, узяць аўтограф у зорак оперы і балета тэатра, разгледзець майстэрства грымёра ў дзеянні.

На працягу ўсёй "Тэатральнай раніцы" гледачоў чакаюць тэатралізаваныя музычныя паказы, конкурсы, загадкі, віктарыны, падарожжы - з падарункамі і сувенірамі. На падобных мерапрыемствах самымі папулярнымі зонамі станавіліся тыя, дзе можна навучыцца майстэрству балета або ігры на музычных інструментах. Вядома, гэта можна будзе зрабіць і 15 кастрычніка. Але на гэты раз да інтэрактываў "Хачу іграць у аркестры!" і "Хачу танцаваць у балеце!" дадаўся "Хачу быць артыстам!" - майстар-клас па акцёрскім майстэрстве для дзяцей і дарослых. Дарэчы, толькі ў гэту "... Раніцу" можна сустрэць любімых артыстаў разам са сваімі сем'ямі.

Білеты на свята можна будзе набыць у гэты ж дзень, нядзелю 15 кастрычніка за гадзіну да пачатку мерапрыемства - з 10.00 у касе тэатра. Продаж білетаў закончыцца ў 14.30. Цэнтральныя дзверы будуць адчынены з 11.00.

версія для друку

зрабіць стартавай

дабавіць у выбранае