Падзеі, факты, анонсы

Прэм'еру спектакля без слоў "Дзюймовачка" падрыхтаваў Беларускі тэатр "Лялька"

6 верасня, Віцебск /Алеся Пушнякова - БЕЛТА/. Прэм'еру спектакля "Дзюймовачка" паводле матываў казкі Х.К.Андэрсена Беларускі тэатр "Лялька" пакажа 7 верасня. У тэатры адбыўся генеральны прагон паказу, перадае карэспандэнт БЕЛТА.

Віцебскія лялечнікі будуць паказваць спектакль без слоў. Знаёмы сюжэт, вядомы ўсім з дзяцінства, не мае патрэбы ў дадатковым выкладанні, таму юным гледачам можна засяродзіцца на тым, што адбываецца на сцэне.

Спектакль адкрываецца інтэрактыўным уступам - з залы на сцэну выходзяць артысты, апранутыя ў цёмныя касцюмы і маскі. Яны знаходзяць кнігу, раскрыўшы якую, выпускаюць святло казкі пра Дзюймовачку.

Дэкарацыі дапаўняюць дзеянні герояў. Тут і старадаўні куфар, на якім жыве цудоўная гераіня казкі, і балотная купіна жабінай сям'і, раскідзістае дрэва, на якім праводзяць іскрамётную дыскатэку вусені, матылі і іншыя насякомыя. Норкі пацука і крата - гэта куфры, у кожнага набітыя сваім дабром, з якім падземныя жыхары ніяк не хочуць расставацца. І вядома, прыгожая вялікая кветка, на якой жыве Прынц эльфаў.

Героі не расказваюць пра свае пачуцці і перажыванні. Усё гэта закладзена ў іх дзеяннях і інтанацыях, з якімі жабы квакаюць, жук гудзе, а маленькая дзяўчынка, якая з'явілася з чароўнай кветкі, усклікае і гаворыць на мове лялечнага цела. Насмешкі вусеняў, самазадаволенасць крата, удзячнасць ластаўкі і рапноўнае каханне паміж Дзюймовачкай і яе выбраннікам, які дорыць ёй крылы, - усё чытаецца лёгка нават для дзяцей.

Спектакль суправаджаецца гарманічна падабранай музыкай. Напрыклад, нешта падобнае на рэп пры з'яўленні багатага крата не можа не выклікаць усмешкі ў гледача, а прыгожая мелодыя палёту ластаўкі, нібыта ўносіць увысь разам з галоўнай гераіняй, якая імчыць да свайго сапраўднага шчасця.

Такую цікавую знаходку для прэм'еры прыдумаў рэжысёр-пастаноўшчык Міхаіл Клімчук разам з Соф'яй Шахноўскай, якая адказвала за сцэнаграфію, лялькі і касцюмы. Выразную харэаграфію паставіла Дзіяна Юрчанка, а музычным суправаджэннем кіраваў Мікіта Гушчанка. Артысты ярка і эмацыянальна прадставілі ўсіх герояў казкі, якая расказвае аб прыгодах маленькай дзяўчынкі, якая прайшла мноства выпрабаванняў, непрыманне, кпіны і ў выніку знайшла сваё месца ў жыцці.

версія для друку

зрабіць стартавай

дабавіць у выбранае