Падзеі, факты, анонсы

Пяючыя чашы, караталы, шум дажджу і акіяна: Белдзяржфілармонія запрашае на музыкатэрапію 14 ліпеня

Фота з архiва

11 ліпеня, Мінск /Кар. БЕЛТА/. Мінскі струнны квартэт у складзе дзвюх скрыпак, альта і віяланчэлі ўпершыню выступіць у праграме "Музыкатэрапія. Шэдэўры ІІ" Беларускай дзяржаўнай філармоніі, паведамілі БЕЛТА ва ўстанове.

"Такі класічны склад струннага квартэта ва ўсе часы быў упрыгажэннем любога канцэрта і мерапрыемства. У названай праграме прагучаць такія яркія і вядомыя творы класічнай музыкі, як арыя "Авечкі могуць пасвіцца спакойна" з "Паляўнічай кантаты" Іагана Баха, вальс "На цудоўным блакітным Дунаі" Іагана Штрауса, адажыа Тамаза Альбіноні і іншыя", - расказалі ў Белдзяржфілармоніі.

"Галоўнай асаблівасцю маючага адбыцца канцэрта бясспрэчна можна назваць гучанне вялікага канцэртнага аргана - аднаго з самых вялікіх арганаў краін СНД, які складаецца больш як з 6 тыс. труб. Гукі аргана гарманізуюць псіхаэмацыянальную сферу, прыводзяць у парадак думкі", - сказалі ва ўстанове.

Таксама госці канцэрта пачуюць рэдкае гучанне аркестравага гонга. "Гэтаму незвычайнаму музычнаму інструменту прыпісваюць гаючы эфект для цела на клетачным узроўні. Яшчэ адной унікальнай асаблівасцю канцэрта будзе стварэнне эфекту аб'ёмнага, ахінаючага гучання дзякуючы музычным астраўкам, якія мы расставім па зале", - азначылі ў Белдзяржфілармоніі.

Паводле слоў арганізатараў, на гэтых астраўках будуць гучаць самыя спрыяльныя для арганізма гукатэрапеўтычныя інструменты: пяючы чашы, караталы, чакрафоны і шум дажджу і акіяна і іншыя. "Музыкатэрапія. Шэдэўры" знайшла водгук у сэрцах вялікай колькасці чалавек і мы вырашылі пашырыць магчымасці, каб яшчэ большая колькасць людзей змагла акунуцца ў свет прыгожага, у свет творчасці, дабрыні і супакаення", - дадалі ва ўстанове.

Канцэртная праграма "Музыкатэрапія. Шэдэўры ІІ" пройдзе 14 ліпеня ў вялікай канцэртнай зале Белдзяржфілармоніі. Пачатак у 19.00.

версія для друку

зрабіць стартавай

дабавіць у выбранае