Падзеі, факты, анонсы

"Падарожжы ў мінулае": вобразы роднай Беларусі прадстаўлены на выставе акварэлі ў НББ

24 сакавіка, Мінск /Кар. БЕЛТА/. Выстава акварэлі Марыі Сыракваш "Падарожжы ў мінулае", прымеркаваная да Года гістарычнай памяці, адкрылася сёння ў галерэі "Панарама" Нацыянальнай бібліятэкі, паведамілі БЕЛТА ва ўстанове культуры.

Галоўная ідэя экспазіцыі - адлюстраваць бясконцы карагод вобразаў роднай Беларусі і іх прыгажосць. Сярод прадстаўленых работ, створаных у 2019-2021 гады, - Крэўскі і Смалянскі замкі, царква і касцёл у Ракаве, сядзібы Рэйтанаў, Дамейкі, Храптовічаў, касцёл у Івянцы, капліца ў Залессі, манастыр картэзіянцаў у Бярозе, пейзажы Гальшанскага замка і Фарнага касцёла.

"Акварэлям мастачкі ўласцівы бязважкасць, свежасць, атмасфернасць і празрыстасць. Уяўны парыў ветру, рух травы, гульня святла на вежах, сакавітыя фарбы - акварэльныя пейзажы нібы матэрыялізуюцца ў паветры і ўяўленні, настолькі насычана кожная выява", - адзначылі ва ўстанове культуры.

Работы мастачкі - вынік шматлікіх падарожжаў нон-стоп па Беларусі, падарожжаў у гістарычнае мінулае роднай зямлі, наведвання знакавых мясцін і малавядомых куткоў. Рамантычныя і шчырыя акварэльныя вобразы даюць магчымасць зазірнуць праз чароўнае шкло ў свет слаўнага мінулага нашай краіны і ўспомніць культурнае багацце краіны, вартасць архітэктуры і гістарычныя падзеі, якія стаяць за кожным помнікам.

версія для друку

зрабіць стартавай

дабавіць у выбранае