12 студзеня, Гродна /Кар. БЕЛТА/. Новую эндавідэахірургічную аперацыю, якая выкарыстоўваецца для выдалення розных відаў грыж, - эндаскапічную татальную экстраперытанеальную пластыку, або e-TEР, упершыню правялі ў Гродзенскай універсітэцкай клініцы. Аб гэтым паведамілі карэспандэнту БЕЛТА ў галоўным упраўленні аховы здароўя Гродзенскага аблвыканкама.
"З дапамогай прымянення спосабу e-TEР пластыкі ў ходзе адной аперацыі можна вырашыць дзве праблемы: прааперыраваць грыжу і паставіць імпланты, якія дазволяць мінімізаваць рызыку яе вяртання ў будучым", - растлумачыў намеснік галоўнага ўрача ўніверсітэцкай клінікі па хірургіі Дзмітрый Якімовіч.
Новую аперацыю 40-гадоваму пацыенту з пупочной грыжай і расцяжэннем мышцаў жывата ён правёў разам з хірургам клінікі Андрэем Кулагам.
Гэты спосаб выключае ўваходжанне ў брушную поласць і дазваляе выдаліць грыжу праз міні-праколы. Таксама ў ходзе аднаго хірургічнага ўмяшання праводзіцца пластыка грыжавых варот з выкарыстаннем сеткаватых імплантаў любых памераў. Для ўстаранення такой праблемы традыцыйным спосабам спатрэбілася б зрабіць вялікі разрэз на месцы грыжы, з наступным утварэннем вялікага пасляаперацыйнага рубца.
Як адзначыў урач, аперацыя па новай методыцы менш траўматычная і больш эфектыўная. Зніжаецца рызыка развіцця рэцыдыву грыжы, пашкоджання ўнутраных органаў і ўзнікнення спаечных працэсаў у брушной поласці. У пасляаперацыйны перыяд пацыенту патрабуецца менш абязбольвальных прэпаратаў. Аднаўленне праходзіць хутчэй, што скарачае тэрмін знаходжання ў стацыянары і дазваляе хутчэй аднавіць працаздольнасць.
Такія грыжы, як правіла, узнікаюць з-за фізічных нагрузак, траўмаў, могуць быць вынікам цяжарнасці. Адзіным эфектыўным спосабам лячэння грыж з'яўляецца аперацыя. Калі не правесці яе своечасова, можа ўзнікнуць ўшчамленне грыжы з рызыкай не толькі для здароўя, але і для жыцця чалавека.