Падзеі, факты, анонсы
Медалі, чатыры камплекты формы і талісмана II Гульняў краін СНД Рысіка прэзентавалі ў Мінску
5 ліпеня ў Мінску прайшло пад знакам II Гульняў краін СНД. Да старту яркай і святочнай падзеі застаўся роўна месяц. Каля сталічнага Палаца спорту знакамітыя спартсмены націснулі сімвалічную кнопку, якая запусціла адлік часу да пачатку спаборніцтваў. Дарэчы, да Палаца спорту ўдзельнікі таксама дабіраліся па-спартыўнаму - на веласіпедах ад чатырох спартыўных аб'ектаў Мінска. Таксама ў Мінскай ратушы былі прадстаўлены камплекты спартыўнай формы, медалі і талісман II Гульняў краін СНД - Рысік.
Аб тым, што талісманам спаборніцтваў, якія стартуюць у Беларусі 4 жніўня, будзе рысь, стала вядома некалькі месяцаў таму. Але сёння яе афіцыйна прадставілі ў Мінскай ратушы. Самабытны Рысік стане не толькі талісманам II Гульняў краін СНД, але і персанажам сувенірнай прадукцыі, якую змогуць набыць балельшчыкі спартыўнага свята. У Міністэрстве спорту і турызму запэўнілі, што дэфіцыту сувеніраў быць не павінна - жыхары і госці Беларусі змогуць купіць не толькі плюшавую рысь, але і кандытарскую прадукцыю айчыннай вытворчасці з вясёлым Рысікам на ўпакоўцы.
У Мінскай ратушы прадставілі і карту госця II Гульняў краін СНД. Начальнік галоўнага ўпраўлення спорту і турызму Мінгарвыканкама Максім Варапай расказаў, што яе ўладальнікі атрымаюць доступ да лепшых музеяў, гасцініц, магазінаў і ўстаноў, дзе можна перакусіць. Гэта пластыкавая картка, уладальнікі якой атрымаюць скідку ў пяцістах розных установах.
На II Гульнях краін СНД разыграюць 1672 медалі з фірменным лагатыпам, якія прадставіў першы намеснік міністра спорту і турызму Аляксандр Дараховіч. Уладальнікі медалёў таксама атрымаюць у падарунак плюшавага Рысіка. Пераможцаў і прызёраў спаборніцтваў вызначаць у 20 відах спорту: баскетбол 3х3, бокс, валейбол, гандбол, дзюдо, каратэ, лёгкая атлетыка, міні-футбол, плаванне, пляжны валейбол, пляжны футбол, самба, сучаснае пяцібор'е, спартыўная барацьба, стральба з лука, стральба кулявая, тайландскі бокс, цяжкая атлетыка, хакей на траве і мастацкая гімнастыка.
Форма для нашых спартсменаў распрацавана з улікам вопыту, атрыманага на Алімпіядзе ў Токіа. Яе прадставіла выконваючая абавязкі генеральнага сакратара НАК Беларусі Ксенія Санковіч. Пры пашыве формы ўлічылі ўсе пажаданні спартсменаў, бо форма павінна быць не толькі стыльнай, але і ў першую чаргу зручнай. Усяго будзе чатыры камплекты: для афіцыйнай дэлегацыі, медперсаналу, валанцёраў і Нацыянальнага антыдопінгавага агенцтва.
версія для друку
зрабіць стартавай
дабавіць у выбранае