Падзеі, факты, анонсы

Мастак Іван Міско на выставе ў Мінску прадставіў свой "Дыялог з космасам"

Фота арганізатара

3 красавіка, Мінск /Кар. БЕЛТА/. У Мастацкай галерэі Міхаіла Савіцкага адкрылася выстава народнага мастака Беларусі Івана Міско "Дыялог з космасам", паведамляе БЕЛТА са спасылкай на Музей гісторыі горада Мінска.

Касманаўтыка - адна з цэнтральных тэм творчасці Івана Міско: на выставе прадстаўлена галерэя скульптурных партрэтаў выдатных прадстаўнікоў "зорнай" прафесіі. Сярод іх - ледзь не ўсе касманаўты былога Савецкага Саюза, а таксама касманаўты - ураджэнцы Беларусі: Уладзімір Кавалёнак, Пётр Клімук і Алег Навіцкі. Народнаму мастаку Беларусі пазіравалі многія ўдзельнікі інтэрнацыянальных экіпажаў - прадстаўнікі Кубы, Румыніі, Манголіі, Францыі, Германіі, Балгарыі, Сірыі, В'етнама, Аўстрыі, Японіі, Афганістана, Індыі.

На выставе таксама прадстаўлена хроніка падзей 12 красавіка 1961 года - у рэдкіх дакументах, фатаграфіях, успамінах Юрыя Гагарына з фондаў Музея-запаведніка Ю.А. Гагарына (Гагарын, Расія), Мемарыяльнага музея касманаўтыкі (Масква, Расія) і Архіва Расійскай акадэміі навук (Масква, Расія). Наведвальнікі могуць прасачыць шлях першага касманаўта ад абуджэння ў 5.30 раніцы да прызямлення ў 10.55 пасля палёту, які доўжыўся 108 мінут. На выставе ёсць і ўнікальныя прадметы з калекцыі сям'і Гагарына: кашуля першага касманаўта, кніга і фатаграфіі з яго аўтографам.

У асобным раздзеле экспазіцыі прадстаўлены фатаграфіі, зробленыя з борта МКС з аўтографамі касманаўта Алега Навіцкага: горад Мінск з вышыні 450 км, выхад у адкрыты космас, усход сонца, неабсяжная планета Зямля. Таксама экспануюцца копіі графічных работ мастакоў-фантастаў.

Выстава будзе працаваць да 30 красавіка 2023 года.

Экспазіцыя арганізавана сумесна з Аб'яднаным мемарыяльным музеем-запаведнікам Ю.А. Гагарына, Мемарыяльным музеем касманаўтыкі (Масква), архівам Расійскай акадэміі навук.

версія для друку

зрабіць стартавай

дабавіць у выбранае