Падзеі, факты, анонсы

Касмічны квест і рамантычная вячэра ў падарунак. Якой будзе "Ноч музеяў" у гістарычным цэнтры сталіцы

Фота з архiва

19 мая, Мінск /Кар. БЕЛТА/. У рамках міжнароднай акцыі "Ноч музеяў - 2023" на трох лакацыях у гістарычным цэнтры Мінска будуць працаваць сем выставак і пастаянных экспазіцый. Чым здзівяць музеі мінчан і гасцей горада, даведалася карэспандэнт БЕЛТА.

Купіўшы білет у адной з трох лакацый Музея гісторыі горада Мінска (выставачныя залы па вул. Ракаўскай, 17, Мастацкая галерэя Міхаіла Савіцкага і Мінская гарадская ратуша), задзейнічаных у праграме, можна будзе наведаць адразу сем выставак і пастаянных экспазіцый. Для наведвальнікаў Мастацкай галерэі Міхаіла Савіцкага будуць працаваць выставы "Дыялог з космасам", "Мінск: учора, сёння, заўтра" і пастаянная экспазіцыя Мастацкай галерэі і інш.

Новыя выставачныя залы на вуліцы Ракаўскай пакажуць мінчанам і гасцям сталіцы экспазіцыю "Маё імя - Мінск".

У Мінскай гарадской ратушы будзе дзейнічаць выстава "Гарадскі праменад: Мінск на старых паштоўках". Акрамя таго, госці ратушы змогуць убачыць пастаянную экспазіцыю сталічнай выдатнай мясціны. Таксама на працягу вечара ўсе жадаючыя змогуць падняцца на балкон ратушы.

Галоўнай падзеяй музейнай ночы стане касмічны квест. На шляху да запаветнай мэты ўдзельнікаў квеста чакаюць загадкі, адказы на якія будуць схаваны ў музейных залах. Тым, хто вырашыць прайсці квест, давядзецца паказаць творчыя здольнасці, уступіць у кантакт з драідам і гуманоідам, павандраваць у часе ў Мінск розных гістарычных перыядаў і нават перанесціся на Крайнюю Поўнач. Дапоўніць акунанне ў розныя эпохі і прасторы атмасферная музычная праграма.

Тыя ж, хто паспяхова выканае заданні квеста, не застанецца з пустымі рукамі і зможа паўдзельнічаць у розыгрышы прызоў. Пераможцаў чакае рамантычная вячэра пад зоркамі з відам на Верхні горад і іншыя прыемныя падарункі.

У 22.00 у галерэі Савіцкага ў прасторы выставы "Дыялог з космасам" адбудзецца лекцыя на тэму "Космас у сусветным кінематографе", дзе можна будзе даведацца, як у кіно паказваюць космас і чаму яго візуальны вобраз змяняўся з цягам часу.

Тры лакацыі Музея гісторыі горада Мінска будуць працаваць у "Ноч музеяў" 20 мая з 20.00 да 24.00.

версія для друку

зрабіць стартавай

дабавіць у выбранае