Падзеі, факты, анонсы

8 лютага, Мінск /Кар. БЕЛТА/. Госці з 29 краін прымуць удзел у XXIII Мінскай міжнароднай кніжнай выстаўцы-кірмашы, паведаміла на прэс-канферэнцыі міністр інфармацыі Беларусі Лілія Ананіч, перадае карэспандэнт БЕЛТА.

Выстаўка прырасла па колькасці ўдзельнікаў, адзначыла міністр. У іх ліку Азербайджан, Расія, Украіна, Вялікабрытанія, Венесуэла, Італія, Палесціна, Турцыя, Фінляндыя, Францыя, Чэхія, Швейцарыя, ЗША, Эквадор і іншыя. Краінай - пачэсным госцем выступіць Арменія. З 8 па 11 лютага праходзяць Дні культуры Арменіі ў Беларусі.

Праграма выстаўкі-кірмашу ўключае больш як 200 мерапрыемстваў, у тым ліку прэзентацыі кніжных праектаў, сустрэчы з вядомымі беларускімі і замежнымі аўтарамі. Аб'ёмную экспазіцыю прадставяць краіны СНД, тэма 25-годдзя якога знойдзе сваё адлюстраванне на выстаўцы. Таксама будзе арганізаваны шырокі гандаль кніжнай прадукцыяй.

На выстаўцы адбудзецца ўручэнне ўзнагарод пераможцам 55-га Нацыянальнага конкурсу "Мастацтва кнігі".

У бягучым годзе атрымае свой працяг традыцыя міжнароднага сімпозіума літаратараў. Праект рэалізуецца Міністэрствам інфармацыі, галоўнымі арганізатарамі выступаюць выдавецкі дом "Звязда" і выдавецтва "Мастацкая лiтаратура", Саюз пісьменнікаў Беларусі.

"Вельмі важна, што наша краіна стала пляцоўкай для абмену думкамі знакамітых пісьменнікаў шэрага краін", - лічыць Лілія Ананіч.

XXIII Мінская міжнародная кніжная выстаўка-кірмаш пройдзе 10-14 лютага. Арганізатары форуму - Міністэрства інфармацыі і Мінскі гарадскі выканаўчы камітэт. Выстаўка пройдзе ў "Белэкспа" (пр.Пераможцаў, 14). Уваход свабодны.