Падзеі, факты, анонсы
Фестываль "Беларуская музычная восень" адкрыецца канцэртам сімфанічнага аркестра
Фота з архiва
12 кастрычніка, Мінск /Кар. БЕЛТА/. Міжнародны фестываль мастацтваў "Беларуская музычная восень" адкрыюць 12 кастрычніка канцэртам Дзяржаўнага акадэмічнага сімфанічнага аркестра Беларусі з цыкла "Класіка для ўсіх" пад кіраўніцтвам галоўнага дырыжора народнага артыста Беларусі Аляксандра Анісімава ў Белдзяржфілармоніі. Аб гэтым БЕЛТА паведамілі ва ўстанове культуры.
Асенні форум пройдзе 49-ы раз і аб'яднае лепшыя музычныя творы і імёны, якія дапамогуць самаму шырокаму колу слухачоў акунуцца ў разнастайнасць жанраў і стыляў айчыннай і замежнай музыкі. 12 кастрычніка ў малой зале імя Р.Шырмы госці таксама змогуць пачуць канцэртную праграму "Анталогія" квартэта саксафаністаў SAXAS, які прадставіць мноства прэм'ер, а 13 кастрычніка ў Малой зале адбудзецца вечар скрыпічнай музыкі. 17 кастрычніка ў Белдзяржфілармоніі выступіць вядомы расійскі арганіст і кампазітар, лаўрэат міжнародных конкурсаў, дацэнт Маскоўскай дзяржаўнай кансерваторыі імя П.І.Чайкоўскага Аляксей Шмітаў. Сярод расійскіх калектываў, якія прымуць удзел у фестывалі, ёсць група Three Sticks, ансамбль казачай песні і танца "Златая Русь" і камерны ансамбль "Салісты Масквы". А 21 кастрычніка разам з квінтэтам Арка Аўруцкага на сцэне выступіць адзін з самых знакамітых саксафаністаў і трубачоў Кубы Карлас Энрыке.
Нязменны складнік фестывальнай афішы - канцэрты харавой музыкі. Дзяржаўная акадэмічная харавая капэла імя Р.Шырмы прадставіць новую праграму "Іншая прастора" 31 кастрычніка. "Гэты незвычайны, атмасферны канцэрт складуць харавыя творы, аб'яднаныя ідэяй музычнай медытатыўнасці. Кожная з кампазіцый змяшчае ў сабе фундаментальныя рэчы, адзіныя для ўсяго чалавецтва: імкненне да любові, святла, надзеі, радасці, вечнасці, міру", - заўважыла галоўны дырыжор капэлы Вольга Янум.
У час фестывалю госці змогуць атрымаць асалоду ад твораў класікаў, джазавых і рок-кампазіцый, хітоў савецкай і французскай эстрады, а таксама мелодый з кінафільмаў, мюзіклаў і аперэт. Фестываль пройдзе з 12 кастрычніка па 30 лістапада.
версія для друку
зрабіць стартавай
дабавіць у выбранае