28 ліпеня, Мінск /Кар. БЕЛТА/. Беларуская скакуха Віялета Скварцова нацэлена выступіць на Алімпіядзе-2020. Аб гэтым яна сёння расказала журналістам у час ушаноўвання беларускіх лёгкаатлетаў у Міністэрстве спорту і турызму, перадае карэспандэнт БЕЛТА.
"У Італіі я хацела выйграць, і мне гэта ўдалося. Я не адчуваю цяжару медаля на шыі і не думаю, што ў далейшым ад гэтага ў мяне з'явіцца карона. Цяпер ідзе старанная падрыхтоўка, нацэленая на Алімпійскія гульні - 2020 у Токіа", - расказала Віялета Скварцова.
У сваю чаргу беларускі скакун у вышыню Максім Недасекаў адзначыў, што марыць паўдзельнічаць у прэстыжных спаборніцтвах "Брыльянтавай лігі".
На чэмпіянаце Еўропы (U-20) па лёгкай атлетыцы ў Італіі беларуская спартсменка Віялета Скварцова ў трайным скачку заваявала залатую ўзнагароду, у скачках у вышыню на вышэйшую прыступку п'едэстала падняўся Максім Недасекаў, які ўстанавіў лепшы рэзультат сезона ў свеце для 20-гадовых атлетаў.