Падзеі, факты, анонсы
Беларускае геаграфічнае таварыства перадало ў Нацыянальную бібліятэку рэдкую калекцыю кніг
Фота nlb.by
21 жніўня, Мінск /Кар. БЕЛТА/. У Нацыянальнай бібліятэцы Беларусі адбылася цырымонія перадачы выданняў ад Беларускага геаграфічнага таварыства, паведамляе карэспандэнт БЕЛТА.
Перададзеная калекцыя складаецца з 33 кніг. Гэта альбомныя выданні, прысвечаныя ваеннай гісторыі Расіі і Савецкага Саюза ў першай палавіне ХХ стагоддзя (Руска-японская, Першая сусветная і Вялікая Айчынная войны). Значная частка кніг выдадзена дзякуючы выдавецкаму праекту найбуйнейшага ў Расіі прыватнага Музея тэхнікі Вадзіма Задарожнага. Праект дае магчымасць паглядзець на старонкі гісторыі вачамі яе сведак, непасрэдных удзельнікаў. У кнігах прадстаўлены ўнікальныя архіўныя матэрыялы і фатаграфіі, многія з якіх публікаваліся ўпершыню.
"Калі мы паглядзім на гісторыю развіцця грамадскіх структур, то і Нацыянальная бібліятэка, і геаграфічныя таварыствы ў той ці іншай краіне з'яўляюцца важнымі арганізацыямі. Іх дзейнасць дае магчымасць дзяржаве і грамадству ўразумець сябе. Бібліятэка - гэта ўнікальны культурны аб'ект, а не проста кнігасховішча. Функцыі бібліятэкі і геаграфічных таварыстваў даволі блізкія, паколькі мы аб'ядноўваем людзей, якія вывучаюць краіны і планеты і збіраюць пэўную інфармацыю. Асэнсаванне свайго месца ў свеце - гэта не толькі духоўная работа, але і працэс, які мае канкрэтныя геаграфічныя каардынаты", - адзначыў генеральны дырэктар Нацыянальнай бібліятэкі Беларусі Вадзімір Гігін.
"Цяпер мы атрымліваем вельмі важныя выданні ад Беларускага геаграфічнага таварыства, а таксама знаходзімся напярэдадні выдання нацыянальнага атласу Беларусі. Для нас гэтыя элементы супрацоўніцтва маюць сістэмны характар, і я перакананы, што для калег, з якімі мы заключаем дагавор, таксама", - дадаў Вадзім Гігін.
Старшыня Беларускага геаграфічнага таварыства Аляксей Яротаў адзначыў, што кнігі, якія яны перадаюць у дар Нацыянальнай бібліятэцы Беларусі, перш за ўсё адлюстроўваюць падзеі, цесна звязаныя менавіта з гісторыяй нашай краіны. "У іх апісваюцца падзеі, з'явы і факты, якія адбываліся або былі звязаны з гісторыяй краіны. Напрыклад, гісторыя паветраплавання карабля "Ілья Мурамец-16" звязана з Валожынскім і Смаргонскім раёнамі Гродзенскай вобласці, а экіпаж паветранага карабля здзейсніў беспрэцэдэнтны подзвіг. У гонар камандзіра карабля, які быў выхадцам з Азербайджана, нават устаноўлены помнік. У ім увекавечана садружнасць Беларусі, Расіі і Азербайджана", - дадаў Аляксей Яротаў.
Кнігі серыі "Маршалы Перамогі. Па старонках сямейнага альбома", асноўная ідэя якіх - паказаць гісторыю жыцця палкаводцаў у дні міру і вайны, расказаную не прафесійнымі гісторыкамі, а іх нашчадкамі, цесна звязаны з нашай краінай. Многія з камандзіраў у час Першай сусветнай вайны пачыналі тут свой шлях, а сама вайна праходзіла практычна праз усю краіну, прычыняючы вялікія страты.
Паводле слоў старшыні Беларускага геаграфічнага таварыства, кнігі, звязаныя з асобнымі лёсамі, адкрываюць факты, якія не шырока прадстаўлены ў адкрытай прэсе. Нацыянальная бібліятэка - менавіта такое месца, дзе павінны знаходзіцца такія кнігі, каб любы грамадзянін мог прыйсці і скарыстацца імі, паколькі ведаць сваю гісторыю вельмі важна для маладога падрастаючага пакалення. Пры гэтым пазнаёміцца з гісторыяй Беларусі могуць не толькі грамадзяне краіны. Паколькі існуе лічбавая бібліятэка, любы жыхар зямнога шара здольны зайсці на сайт і даведацца штосьці новае з прадстаўленых матэрыялаў.
версія для друку
зрабіць стартавай
дабавіць у выбранае