Падзеі, факты, анонсы

Беларус Алфёраў гарантаваў медаль чэмпіянату Еўропы па боксе

Аляксей Алфёраў. Фота НАК

25 красавіка, Мінск /Кар. БЕЛТА/. У сталіцы Сербіі Бялградзе прадаўжаецца чэмпіянат Еўропы па боксе з удзелам беларускіх спартсменаў, паведамляе карэспандэнт БЕЛТА.

У сераду на турніры адбыліся чвэрцьфінальныя баі ў мужчын. У вагавой катэгорыі да 86 кг наш Аляксей Алфёраў аднагалосным рашэннем суддзяў перамог грэка Дыянісіяса Псіхагіёса і выйшаў у паўфінал. У папярэднім крузе беларус не менш упэўнена разабраўся з іспанцам Пабла Берналем. Наступным сапернікам Аляксея стане італьянец Вінчэнца Ліцы, гэты паядынак адбудзецца 25 красавіка ў вячэрняй праграме. Алфёраў ужо забяспечыў сабе мінімум бронзавы медаль, паколькі баі за трэцяе месца на турніры не прадугледжаны.

Яшчэ адзін прадстаўнік Беларусі Артур Туніеў прабіцца ў чацвёрку лепшых у катэгорыі да 60 кг не змог - наш баксёр уступіў пасеянаму пад першым нумарам балгарыну Радаславу Расенаву. Акрамя Алфёрава, у чацвер свае паўфінальныя баі правядуць беларускі Арына Данільчык і Вікторыя Кебікава. Данільчык у вазе да 70 кг пазмагаецца з венгеркай Рэгінай Лакаш, а Кебікава ў катэгорыі да 81 кг паспрачаецца за выхад у фінал з расіянкай Аленай Гапешынай.

Усяго кантынентальны форум у Сербіі сабраў 337 баксёраў з 34 краін, якія разыграюць 25 камплектаў узнагарод. Фінальныя паядынкі адбудуцца ў суботу і нядзелю.

версія для друку

зрабіць стартавай

дабавіць у выбранае