Падзеі, факты, анонсы

БДУ падняўся на 43 пазіцыі ў рэйтынгу QS па прыродазнаўчых навуках

Фота з архiва

10 красавіка, Мінск /Кар. БЕЛТА/. Беларускі дзяржаўны ўніверсітэт падняўся на 43 пазіцыі ў рэйтынгу Quacquarelli Symonds (QS) у прыродазнаўчанавуковай галіне, паведамілі БЕЛТА ў прэс-службе навучальнай установы.

У канцы сакавіка брытанскае рэйтынгавае агенцтва Quacquarelli Symonds апублікавала прадметныя рэйтынгі ўніверсітэтаў свету па 54 навуковых напрамках у пяці галінах.

БДУ - адзіная ВНУ з Беларусі, прадстаўленая ў прадметных рэйтынгах QS. Універсітэт захаваў мінулагоднія паказчыкі ў групе 351-400 у галіне "фізіка і астраномія" і на 43 пазіцыі падняўся ў "прыродазнаўчанавуковай галіне", заняўшы 341 месца. Акрамя таго, ВНУ ўпершыню ўвайшла ў два новыя прадметныя рэйтынгі. Па "галіне інжынерыі і тэхналогіі" яна ранжыравана ў групе ВНУ з пазіцыямі 401-450, а па прадмеце "камп'ютарныя навукі і інфармацыйныя сістэмы" размясцілася сярод ВНУ ў групе 651-680.

"У аснову методыкі прадметнага рэйтынгу QS пакладзена чатыры крытэрыі. Гэта рэпутацыя ВНУ па выніках апытання міжнародных акадэмічных экспертаў і работадаўцаў, сярэдняя колькасць цытавання навуковых публікацый за пяцігадовы перыяд і індэкс Хірша ВНУ ў гэтай навуковай галіне. Рост пазіцый БДУ і ўваходжанне ў новыя ранжыраваныя сістэмы адбыліся з-за паляпшэння ацэнкі работадаўцаў і акадэмічных экспертаў. БДУ атрымаў 68 балаў са 100, што пацвярджае якасць беларускай адукацыі і прызнанне яе ва ўсім свеце", - адзначылі ў прэс-службе ВНУ.

Прадметныя рэйтынгі распрацаваны для дапамогі студэнтам у выбары лепшых універсітэтаў па напрамках, якія іх цікавяць, паколькі агульныя рэйтынгі дэталёва не адлюстроўваюць якасць падрыхтоўкі на асобных факультэтах. У кожным з навуковых напрамкаў QS ранжыруецца да 3 тыс. ВНУ, але з іх у рэйтынгавай табліцы паказваюць толькі каля 700 мацнейшых універсітэтаў. У версіі 2023 года сумарна ацэнены 1594 ВНУ са 161 краіны. Усяго ў свеце налічваецца больш за 30 тыс. ВНУ.

У БДУ адзначылі, што ўніверсітэт прадстаўлены і ў прадметных рэйтынгах іншых агенцтваў: Шанхайскім прадметным рэйтынгу па фізіцы (група 201-300); Times Higher Education па "інжынерных навуках і тэхналогіях" (1001+) і "фізічных навуках" (1001+); U.S. News па фізіцы (224) і па хіміі (865). Таксама БДУ ўдзельнічае ў дзевяці глабальных рэйтынгах універсітэтаў свету, сярод якіх самы аўтарытэтны асноўны рэйтынг QS. Тут БДУ размясціўся на 288 месцы.

версія для друку

зрабіць стартавай

дабавіць у выбранае