Падзеі, факты, анонсы

Арына Сабаленка стане першай ракеткай свету па выніках US Open

Фота з архiва

4 верасня, Мінск /Кар. БЕЛТА/. Беларуская тэнісістка Арына Сабаленка пасля заканчэння US Open стане першай ракеткай свету, пацясніўшы ў рэйтынгу Жаночай тэніснай асацыяцыі (WTA) з верхняга радка польскую тэнісістку Ігу Свёнтак. Аб гэтым паведамляе БЕЛТА са спасылкай на афіцыйны сайт WTA.

Польская тэнісістка Іга Свёнтак узначальвала рэйтынг WTA з красавіка 2022 года. Для захавання першай пазіцыі ёй трэба было выступіць на US Open лепш, чым Арына Сабаленка. Аднак гэтага не адбылося. Іга Свёнтак пацярпела паражэнне ў матчы 1/8 фіналу адкрытага чэмпіянату ЗША па тэнісе ў Нью-Ёрку. У барацьбе за выхад у чвэрцьфінал польская тэнісістка саступіла Алене Астапенка з Латвіі.

Сабаленка ж прадаўжае барацьбу, яна выйшла ў 1/8 фіналу адкрытага чэмпіянату ЗША па тэнісе, разграміўшы францужанку Клару Бюрэль. За выхад у чвэрцьфінал турніру Арына пазмагаецца з Дар'яй Касаткінай з РФ.

Па ходзе сезона беларуская тэнісістка адзначала, што для яе важней за ўсё тое, што будзе ў яго канцы. "Для мяне важней, як ты заканчваеш год, а не тое, што на працягу года ты становішся першай, другой, падымаешся, зноў апускаешся. Я прадоўжу працаваць і зраблю ўсё магчымае, каб закончыць гэты год першай ракеткай свету", - цытаваў Сабаленка sports.ru.

версія для друку

зрабіць стартавай

дабавіць у выбранае