Падзеі, факты, анонсы

Ад мінулага да сучаснага рэпарцёрскай справы: у Дзень пісьменства БЕЛТА прадставіла свой павільён

2 верасня, Гарадок /Алеся Пушнякова - БЕЛТА/. Апарат Морзэ, пераносны магнітафон, кнігі аб генацыдзе - БЕЛТА прэзентуе ў Дзень беларускага пісьменства ў Гарадку свой павільён, перадае карэспандэнт БЕЛТА.

Для гасцей і ўдзельнікаў XXX Дня пісьменства ў Гарадку БЕЛТА прэзентуе выставу рарытэтнай тэхнікі. Тэлеграфны апарат Бадо, фотатэлеграфны апарат "Нява", апарат Морзэ, пераносны рэпарцёрскі магнітафон, пішучыя машынкі - для сучаснага журналіста гэтыя дастойныя "пенсіянеры" з'яўляюцца своеасаблівымі рэліквіямі. Экспазіцыя прыцягвае ўвагу прахожых ад малога да вялікага, а "адправіць пасланне" азбукай Морзэ для гасцей свята - прыемная магчымасць. Рэдка хто можа ўтрымацца і не зрабіць сэлфі з такімі ўнікальнымі апаратамі.

"У бягучым годзе ў Гарадку праходзіць юбілейны, 30-ы Дзень пісьменства і БЕЛТА адзначае 105-годдзе. Мы прывезлі ўнікальную экспазіцыю, другой такой няма, - анансаваў работу павільёна першы намеснік генеральнага дырэктара БЕЛТА Васіль Мацвееў. - Мы прадстаўляем усе машыны, на якіх працавалі супрацоўнікі БЕЛТА з даваеннага часу. Гэта наша гісторыя, якую нам прыемна прадставіць гасцям і ўдзельнікам маштабнага свята. Таксама мы прадстаўляем нашы друкаваныя выданні, прадукцыю нашага выдавецтва. У бягучым годзе гэта дзве адметныя кнігі - "Архівы. Нічога, акрамя праўды" і "Апошнія сведкі". У іх расказваецца пра генацыд беларускага народа ў час Вялікай Айчыннай вайны. Гэтыя кнігі мы будзем прэзентаваць у нядзелю, 3 верасня. Сёння ў нашым павільёне пройдуць сустрэчы школьнікаў з вядомымі літаратарамі, дыскусіі пра сучаснае беларускае літаратурнае слова. У час прэзентацыі нашай пляцоўкі мы прадэманструем работу стартстопнай фотатэлеграфнай машыны і пакажам, як больш за 60 гадоў таму перадаваліся фатаграфіі і тэкставыя матэрыялы".

версія для друку

зрабіць стартавай

дабавіць у выбранае