Першы намеснік Генеральнага сакратара ААН Аміна Махамед наведала Рэспубліканскі рэабілітацыйны цэнтр для дзяцей-інвалідаў

Першы намеснік Генеральнага сакратара ААН Аміна Махамед сёння наведала Рэспубліканскі рэабілітацыйны цэнтр для дзяцей-інвалідаў і высока ацаніла ўзровень дзяржаўна-прыватнага партнёрства і супрацоўніцтва з грамадскімі арганізацыямі ў пытанні забеспячэння аднолькавых умоў развіцця для ўсіх дзяцей.

Намеснік старшыні Савета Рэспублікі, нацыянальны каардынатар па дасягненні МУР Мар'яна Шчоткіна на прыкладзе цэнтра паказала Аміне Махамед, як пры ўзаемадзеянні сістэм аховы здароўя, адукацыі, прыватных партнёраў і валанцёраў арганізавана комплексная паэтапная рэабілітацыя дзяцей.

Паводле слоў дырэктара цэнтра Людмілы Кандрашовай, работа ўстановы адпавядае Мэтам устойлівага развіцця. "Мы працуем і ў сферы аховы здароўя, пры гэтым прытрымліваемся дэвіза "Ніхто не застаецца ўбаку", таму што ўзаемадзейнічаем з камітэтамі па працы, занятасцi i сацабароне ў рэгіёнах. Папаўняем спісы дзяцей, якія маюць патрэбу ў рэабілітацыі. Арганізавана паўнацэнная адукацыйная праграма і нават прафарыентацыя, ёсць шмат гульнявых элементаў. Таксама аказваецца псіхалагічная падтрымка для маці выхаванцаў. Дзякуючы ўдаламу размяшчэнню ў Севастопальскім парку мы прывівам дзецям клопат аб прыродзе. Не проста ствараем асяроддзе дзіцяці з асаблівасцямі, а стараемся зрабіць так, каб яно выйшла ў соцыум і стала раўнапраўным грамадзянінам", - адзначыла Людміла Кандрашова.

Дзяржустанова Міністэрства працы і сацыяльнай абароны "Рэспубліканскі рэабілітацыйны цэнтр для дзяцей-інвалідаў" адкрыта ў адпаведнасці з праграмай "Дзеці Беларусі" ў 2000 годзе, яна разлічана на адначасовае знаходжанне 120 хлопчыкаў і дзяўчынак. Цэнтр спраектаваны па аналагах еўрапейскіх устаноў для комплекснай рэабілітацыі па індывідуальных праграмах дзяцей з 3 да 18 гадоў з захворваннямі нервовай і касцёва-мышачнай сістэм, вынікам якіх з'яўляецца парушэнне функцый апорна-рухальнага апарату. За 17 гадоў рэабілітацыю ў цэнтры прайшлі больш за 17 678 дзяцей.